اقىن، جازۋشى قاجىبەك توتەكين دۇنيەدەن وزدى
قاجىبەك توتەكين 1940- جىلى 1-جەلتوقساندا قىتاي حالىق رەسپۋبليكاسىنىڭ تارباعاتاي ايماعى، تولى اۋدانىندا دۇنيەگە كەلگەن. اۋىل- اۋدانداردا جاۋاپتى قىزمەتتەردە 1958-جىلدان 1998-جىلعا دەيىن 40 جىل قىزمەت ىستەپ زەينەتكە شىققان.
ق. توتەكيننىڭ ەسىمى مەملەكەتتىك «ادەبيەت كوركەمونەر سالاسىنداعى ايگىلى ادامدار» ەنسكلوپەدياسىنا «20-عاسىر قىتاي جازۋشىلارى» ەنسيكلوپەدياسىنا ەنگەن. شىڭجاڭ جازۋشىلار قوعامىنىڭ، قازاقستان اۆتورلار قوعامىنىڭ مۇشەسى.
شىعارماشىلىق ساپارىن 1958-جىلى «شۇعىلا» جۋرنالىنا شىققان «ۇلى جوسپار» دەگەن ولەڭىمەن باستاعان اقىن سودان بەرى ادەبيەتتىڭ بارلىق جانرىندا قالام تەربەگەن. ءتۇرلى توپتامالارى باسىلۋدان سىرت «دوڭگەلەنگەن دۇنيە» اتتى اڭگىمە- پوۆەستتەر جيناعى، «ساقابانىڭ ساتيرالارى» ەسسە- اڭگىمەلەر جيناعى، «سەرۋەن سەزىمدەر» اتتى جىر كىتابى جىر كىتابى شىڭجاڭ باسپالارىنان شىقسا، 2002 -جىلدان بەرى قاراي «جانىم ساعان ايتايىن» جىر كىتابى، «بويتۇمار» اڭگىمە- ەسسە كىتابى، «دارىماعان قارعىس» اتتى ولەڭ رومانى قازاقستاندا جارىق كوردى.
بيىل «اتاسى مەن ەدىگەنىڭ قىزىقتى حيكايالارى» اتتى بالالارعا ارنالعان كىتابى مەن «وسى شاردا مەن بارمىن» اتتى جىر جيناعى باسپاعا ۇسىنىلعان ەكەن.
مارقۇمنىڭ جاناز ناماز بۇگىن (17،08،2021) ساعات 12:00 دە ءوز ۇيىندە وقىلادى. مەكەن-جايى: الماتى وبلىسى، تالعار اۋدانى، تۇزدىباستاۋ اۋىلى، ستامباق كوشەسى 62-ءۇي.
اۆتور: بەيسەن سۇلتان ۇلى
