تۇرمەلەردە ءوندىرىس ورىندارى اشىلماق – ش ق و

وسكەمەن. قازاقپارات - شىعىس قازاقستان وبلىسىندا سوتتالعانداردى جۇمىسپەن قامتۋ ءۇشىن كاسىپكەرلەرگە تۇزەتۋ مەكەمەلەرىندە ءوندىرىس ورىندارىن اشۋ ۇسىنىلدى، دەپ حابارلايدى قازاقپارات ءتىلشىسى.

ق ا ج دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، سوتتالعانداردى جۇمىسپەن قامتاماسىز ەتۋ كورسەتكىشىن ارتتىرۋ، جەكە كاسىپكەرلەردى تارتۋ ماسەلەلەرى بويىنشا وۆ-156/21 مەكەمەسىندە سەمينار ءوتتى. وعان جارما اۋداندىق اتامەكەن كاسىپكەرلەر پالاتاسىنىڭ باسشىسى داستان مۇحايەۆ، شاعىن جانە ورتا كاسىپكەرلەر، «ەڭبەك- وسكەمەن» فەدەرالدى رەسپۋبليكالىق مەملەكەتتىك كاسىپورنىنىڭ وكىلى اسقار سماعۇلوۆ قاتىستى. ولار تۇزەتۋ مەكەمەسى اۋماعىندا ءوندىرىس اشۋ ءۇشىن قانداي جاعدايلار قاراستىرىلعانىن كوردى.

«قىلمىستىق-اتقارۋ جۇيەسى مەكەمەلەرىندە ءوز كاسىبىن اشىپ تابىس تابۋعا ۇمتىلاتىن بارلىق كاسىپكەرلەر ءۇشىن ءبىرشاما مۇمكىندىك كوزدەلگەن. بىرىنشىدەن، كەيىننەن وتەۋ قۇقىعىنسىز سەنىمگەرلىكپەن باسقارۋ شارتىن جاساسۋ ارقىلى ءوندىرىستى جالعا بەرۋ مۇمكىندىگى بار. ياعني، جەكە كاسىپكەرلەر ەلەكتر قۋاتى مەن كوممۋنالدىق قىزمەتتەر ءۇشىن تولەم جاساي وتىرىپ، سەنىمگەرلىكپەن ءوندىرىس اشا الادى. اكىمشىلىك ءوز كەزەگىندە جۇمىس كۇشىمەن قامتاماسىز ەتۋدى، بەينەباقىلاۋدى، وندىرىستەگى ءونىم مەن جابدىقتاردىڭ قورعالۋىن قامتاماسىز ەتەدى»، - دەيدى وۆ-156/21 مەكەمەسى باسشىسىنىڭ ورىنباسارى انارا سابيەۆا.

سوتتالعانداردىڭ ورتاشا جالاقىسى 42500 تەڭگەنى قۇرايدى. جەكە كاسىپكەر جاسۇلان ۋاحانوۆتىڭ ايتۋىنشا، بۇل ءادىس بيزنەس وكىلدەرى ءۇشىن دە مول تابىس اكەلمەك.

«مەن بىرنەشە جىلدان بەرى تۇزەتۋ مەكەمەسىندە كاسىپپەن اينالىسامىن. بايقاۋىمشا، بۇل جەر وتە قولايلى. كولونياداعى قىز- كەلىنشەكتەر ءوز جۇمىستارىنا جاۋاپتى قارايدى جانە گيگيەنا مەن تازالىق ستاندارتتارىنىڭ بارلىق تالاپتارىن ساقتايدى»، - دەيدى ول.

وسىلايشا، كاسىپكەر ءتۇرلى ونىمدەردى تومەن باعادا السا، سوتتالعاندار جۇمىسپەن قامتىلىپ، اقشا تابادى. سونداي- اق جازاسىن وتەپ جاتقاندار وڭ مىنەزدەمە الىپ، بوستاندىققا شىققاننان كەيىن دە قوعامعا تەز بەيىمدەلىپ كەتەدى.