ينتەرنەت ارقىلى ءشوپ ساتىپ الماق بولعان اۋىل تۇرعىنى اقشاسىنان ايىرىلدى

پەتروپاۆل. قازاقپارات - سولتۇستىك قازاقستان وبلىسىندا پوليتسەيلەر مال ازىعىن ساتۋعا قاتىستى بىردەن ءتورت ينتەرنەت الاياقتىقتى تىركەدى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پوليتسياعا مامليۋت اۋدانىنداعى اۋىلدىڭ ءبىرىنىڭ تۇرعىنى جۇگىنىپ، جارناما سايتىندا الدانىپ قالعانىن ايتقان. ايتۋىنشا، ول حابارلاندىرۋ ارقىلى 58 مىڭعا ءشوپ تەڭدەرىنە تاپسىرىس بەرگەن.

ءبىر وراما ءشوپتى 7 مىڭ تەڭگەگە الماق بولعان. الايدا «ساتۋشى» اقشا قولىنا تيىسىمەن، نە قوڭىراۋعا نە حابارلامارعا جاۋاپ بەرمەگەن.

وسىلايشا جابىرلەنۋشى ايەل الدانعانىن تۇسىنگەن. مامليۋت اۋدانى پوليتسيا ءبولىمىنىڭ باستىعى سەرىك ءالجانوۆتىڭ ايتۋىنشا، جەم- شوپكە سۇرانىستىڭ ارتۋىن الاياقتار دا پايدالانعان. كريمينالدىق پوليتسيا بولىمشەسىنىڭ قىزمەتكەرلەرى جەدەل- ىزدەستىرۋ ءىس-شاراسىن وتكىزدى.

قوستاناي وبلىسىنا ءىسساپار بارىسىندا ينتەرنەت- الاياقتىققا بارعان كۇدىكتى انىقتالىپ، ۇستالدى. ول 21 جاستاعى رۋدنىي قالاسىنىڭ تۇرعىنى بولىپ شىقتى. جاس جىگىت ماميۋتكاعا جەتكىزىلدى، قازىرگى ۋاقىتتا تەرگەۋ ارەكەتتەرى جۇرگىزىلىپ جاتىر. اتالعان فاكتى ق ر ق ك 190-بابى 2-بولىگى «الاياقتىق» بويىنشا سوتقا دەيىنگى تەرگەپ- تەكسەرۋلەردىڭ ءبىرىڭعاي تىزىلىمىنە ەنگىزىلدى.

ونىڭ وسىنداي وقيعا جەلىسى بويىنشا قىزىلجار اۋدانىنىڭ تۇرعىنى مەن پەتروپاۆلدىڭ ەكى تۇرعىنى زارداپ شەككەن ينتەرنەت- الاياقتىققا قاتىسى بار-جوعى تەكسەرىلىپ جاتىر.

«الاياقتار ماۋسىمدىق سۇرانىسقا يە تاۋارلاردى جەلەۋ ەتىپ، ۇنەمى جاڭا ايلا مەن وقيعا ويلاپ تابادى. حالىقتى ساق بولۋعا، تاۋار جانە ساتۋشى بويىنشا جۇرتتىڭ پىكىرىن وقىپ، تانىسىپ جانە ولاردان ساتاتىن تاۋارلارىنىڭ بەينەشولۋىن جىبەرۋىن تالاپ ەتۋدى سۇرايمىز»، - دەيدى سەرىك ءالجانوۆ.