كەلەسى وليمپيادا ويىندارىندا قانداي سپورت تۇرلەرى بولمايدى
وسىلايشا، تىزىمنەن كاراتە، بەيسبول جانە سوفتبول الىنىپ تاستالدى. ولاردىڭ ورنىنا ويىندار قاتارىنا برەيك- دانس، سونىمەن قاتار سپورتتىق قۇزعا شىعۋ، سكەيتبوردينگ جانە سەرفينگ قوسىلادى. سوڭعى ءۇش سپورت ءتۇرىن حالىقارالىق وليمپيادا كوميتەتى توكيودا وتكەن وليمپيادا ويىندارىنىڭ باعدارلاماسىنا قوسقان بولاتىن.
ۇيىمداستىرۋ كوميتەتى بۇل شەشىمنىڭ ناقتى ەكەنىن جانە ەندى وزگەرتىلمەيتىنىن مالىمدەدى. تاڭداۋ جاساردا كوميتەت الەۋمەتتىك جەلىلەردەگى سپورت تۇرلەرىنىڭ جاستار اراسىنداعى تانىمالدىلىعىنا ساراپتاما جاسادى. دەگەنمەن بۇكىلالەمدىك كاراتە فەدەراتسياسى بۇل سپورت ءتۇرىنىڭ ءارى قاراي ويىندار تىزىمىندە قالۋعا لايىقتى ەكەنىن مالىمدەدى.
«ءبىز الەمگە كاراتەنىڭ بىرەگەي سپورت ءتۇرى ەكەنىن دالەلدەپ، وليمپيادا باعدارلاماسىنا تۇراقتى سپورت ءتۇرى رەتىندە قوسىلۋعا لايىقتى ەكەنىمىزدى كورسەتتىك. كاراتە وليمپياداعا الەم بويىنشا سپورت جانكۇيەرلەرى باعالايتىن قۇندىلىقتاردى اكەلدى»، - دەدى WKF پرەزيدەنتى انتونيو ەسپينوس.
ويىندار تىزىمىنەن كاراتەنى الىپ تاستاۋ شەشىمىنە وليمپيادا چەمپيونى ستيۆەن دا كوستا قارسىلىق ءبىلدىردى. ول 37 كيلوگرامعا دەيىنگى سالماقتا جەڭىمپاز اتانعان.
«مەن كوپ جاتتىقتىم. فاۆوريت اتاندىم. فرانسياعا التىن اكەلدىم. مەن تۋدى جوعارى كوتەردىم. سول ءۇشىن دە وتە باقىتتى بولدىم. 2024 -جىلى سىزدەردىڭ قولداۋلارىڭىزبەن پاريجدە تيتۋلىمدى قورعاعىم كەلەدى»، - دەپ جازدى سپورتشى Twitter- دە.
ەسكە سالا كەتەيىك، كاراتە العاش رەت وليمپيادا باعدارلاماسىنا توكيوداعى ويىنداردا قوسىلدى. بۇل وتاندىق كاراتەشىلەر دارحان ءاسادىلوۆ پەن سوفيا بەرۋلتسيەۆاعا قازاقستان ءۇشىن ەكى قولا الىپ كەلۋگە مۇمكىندىك بەردى.
اۆتور: ءبيبىحان سەرىكوۆا
