اۋعانستاندا ۋاقىتشا ۇكىمەت قۇرىلدى
وسىنىڭ الدىندا «تاليبان» اۋعانستان اۋماعىن تولىقتاي باسىپ العان بولاتىن. بۇل تۋرالى وسى ەلدىڭ ىشكى ىستەر ءمينيسترىنىڭ مىندەتىن اتقارۋشى ابدۋل- ساتتار ميرزاكۆال تىكەلەي ەفيردە مالىمدەدى.
ال تالىپتەر كابۋلداعى شەتەلدىكتەرگە: «ەلدەن كەتىڭدەر نەمەسە «تاليبان» قوزعالىسىنىڭ وكىلدىكتەرىنە كەلىپ، تىركەلۋ كەرەك» دەگەن تالاپ قويدى. «رەيتەر» اگەنتتىگىنىڭ حابارلاۋىنشا، «تاليبان» قوزعالىسىنىڭ نەگىزىن قالاۋشى موللا ومار اۋعانستانداعى جاعدايعا سەنىمدى وكىلى، تاليبان ساياسي بيۋروسىنىڭ باسشىسى موللا ابدۋل- عاني باراداردى جاۋاپتى ەتىپ تاعايىنداعان.
«تاليبان» قوزعالىسىنىڭ مۇشەلەرى ەلدە ينكليۋزيۆتى ۇكىمەت قۇرادى. بۇل تۋرالى تالىپتەردىڭ وكىلى سۋحايل شاحين حابارلادى. ونىڭ ايتۋىنشا، بۇرىنعى مينيسترلەر كابينەتىنەن جاڭا ۇكىمەتكە مۇشە بولىپ كىم كىرەتىنى ازىرشە بەلگىسىز. سونىمەن قاتار تالىپتەردىڭ قاتارىنا كىرگەن ءتارتىپ ساقشىلارى مەن پوليتسيا قىزمەتكەرلەرىنە قاۋىپسىزدىك قامتاماسىز ەتىلەتىنىن دە ەسكەرتىپ وتىر.
سۋحايل شاحين، «تاليبان» قوزعالىسىنىڭ وكىلى:
- ءبىز كابۋلدىڭ قاۋىپسىزدىگىن قامتاماسىز ەتەمىز. حالىق پەن ونداعى مۇلىكتىڭ زارداپ شەككەنىن قالامايمىز. ادامداردىڭ قاۋىپسىزدىگى ءۇشىن بارلىق شارالار قولعا الىنۋ كەرەك. ينكليۋزيۆتى بيلىك - اۋعانستان حالقىنىڭ قالاۋى.
www.24.kz
