اۋعانستان پرەزيدەنتى وزبەكستانعا باس ساۋعالادى
«ءال دجازيرا» اقپارات اگەنتتىگىنىڭ حابارلاۋىنشا، ەندى تالىپتەر ايماقتا اۋعانستان يسلام ەميراتىن جاريالاماق.
ال، ەل پرەزيدەنتى اشراف عاني ءوزىنىڭ الەۋمەتتىك جەلىدەگى پاراقشاسىندا بەيبىت حالىقتىڭ قانى توگىلمەۋى ءۇشىن وتستاۆكاعا كەتكەنىن ايتتى. قالدىرعان جازباسىندا «بۇدان بىلاي ەلدىڭ تۇتاستىعى مەن اۋعان حالقىنىڭ اماندىعىنا تالىپتەر جاۋاپتى» ەكەنىن مالىمدەدى.
قازىر اشراف عاني ءوزىنىڭ جۇبايىمەن جانە كەڭەسشىلەرىمەن بىرگە وزبەكستاننىڭ تاشكەنت قالاسىندا. بۇل تۋرالى «ءال دجازيرا» اقپارات اگەنتتىگى حابارلايدى. ال، كابۋلداعى ا ق ش پەن وزگە ەل ەلشىلىكتەرىنىڭ قىزمەتكەرلەرى، سونىمەن قاتار جەرگىلىكتى تۇرعىندار ەلدەن كەتۋ ءۇشىن اۋەجايعا كەلگەن. ا ق ش ەلشىلىگىنىڭ وكىلدەرى بولسا حالىقارالىق اۋەجايدا اتىس بولىپ، ءورت شىققانىن حابارلايدى.
ەستەرىڭىزگە سالايىق، 2001 - جىلى ا ق ش كۇشتەرى اۋعانستانعا كىرگەن ساتتەن، ەلدى 1996 - جىلدان باستاپ بيلەپ كەلگەن «تاليبان» بيلىكتەن كەتكەن بولاتىن. ەندى پەنتاگون اسكەرىن ەلدەن شىعارا سالىسىمەن تالىپتەر بيلىككە قايتا كەلدى.
حالىقارالىق ساراپشىلار «تاليبانعا» قارسى 20 جىل بويى اۋعان ۇكىمەتىنىڭ اسكەرىن دايىنداۋعا جۇمساعان ا ق ش پەن ناتو- نىڭ ميللياردتاعان دوللارى دالاعا كەتتى دەيدى. تالىپتەردىڭ قىسىمىنان باس ساۋعالاعان بوسقىندار ءنوپىرى دە كوبەيدى. امەريكالىق اسكەر تالىپتەر كابۋلدى 1-دەن 3-اي ارالىعىندا باسىپ الادى دەپ بولجاعان بولاتىن. ءبىراق «تاليبان» ءبىر اپتانىڭ ىشىندە پروۆينتسيالار مەن قالالاردى بىرىنەن سوڭ ءبىرىن تىزە بۇكتىرىپ، ەل استاناسىنا تەز جەتىپ كەلدى. كابۋل دا سوعىسسىز بەرىلىپ، بيلىك بەيبىت جولمەن تابىستالدى.
راميش سالەمي، ساراپشى:
- ا ق ش پرەزيدەنتى بايدەن اسكەرىن الىپ كەتەمىن دەگەن ساتتەن باستاپ «تاليبان» شابۋىلدى بىردەن كۇشەيتتى. اۋعانستانداعى سوعىستىڭ سەبەپ- سالدارى وتە كۇردەلى. ادامنىڭ قانى سۋشا توگىلىپ جاتىر. بۇل قىرعىن 40 جىلدان بەرى جالعاسىپ كەلەدى. سىرتقى الپاۋىت كۇشتەردىڭ اۋعان جەرىندەگى تارتىسى ازاماتتىق سوعىسقا ۇلاستى. اۋعانستاننىڭ ستراتەگيالىق مۇددەلەردىڭ تۇيىسكەن جەرىندە، ونىڭ ىشىندە ورتالىق ازيادا ورنالاسقانى وزىنە سور بولىپ تۇر. مەنىڭ ويىمشا، ەلدىڭ تاعدىرىن اۋعان حالقى جان- جاقتى كەلىسسوزدەر ارقىلى ءوز قولىنا الۋى ءتيىس. بۇل - ىشكى ماسەلە.
تالىپتەر باقىلاۋ ورناتقاننان كەيىن تۇرعىندار كابۋلدان جاپپاي كەتە باستادى. تۇركيا مەن يراننىڭ ەلشىلىكتەرىنىڭ الدىندا ۇزىن- سونار كەزەك پايدا بولدى. مىڭداعان اۋعان ازاماتى ۆيزا الۋ ءۇشىن تىزىلگەن.
www.24.kz
