كاراتە جانە تاعى ەكى سپورت ءتۇرى كەلەسى وليمپيادا ويىندارىنان الىپ تاستالدى
تىزىمنەن كاراتە، بەيسبول جانە سوفتبول ويىندارى الىنىپ، جاڭا باعدارلاماعا برەيك-دانس قوسىلعان. حالىقارالىق وليمپيادا كوميتەتى ءىس-شارانىڭ باعدارلاماسىن، سپورتشىلارعا سايكەس كۆوتالاردى جانە پاريج 2024 وليمپيادا ويىندارىنا جاڭا سپورت تۇرلەرىنىڭ ينتەگراتسياسىن راستادى. ۇيىمداستىرۋ كوميتەتى باعدارلامانىڭ تۇپكىلىكتى ەكەنىن جانە ونى وزگەرتۋگە بولمايتىنىن ايتتى.
دۇنيەجۇزىلىك كاراتە فەدەراتسياسىنىڭ پرەزيدەنتى انتونيو ەسپينوسا سپورتتىڭ بۇل ءتۇرى وليمپيادا ويىندارىنا ورالۋى كەرەك ەكەنىن ايتتى.
«ءبىز الەمگە كاراتەنىڭ ەرەكشە سپورت ءتۇرى ەكەنىن كورسەتتىك. ول ارنايى سپورتتىق دايىندىقتى جانە ارنايى تەحنيكانى قاجەت ەتەدى. بۇل وليمپياداعا ۇسىنا الاتىن سپورت، ويتكەنى ول وليمپيادالىق قۇندىلىقتارعا سايكەس كەلەدى»، - دەدى ەسپينوسا.
ايتا كەتەيىك، 2024 -جىلدىڭ 26-شىلدەسىندە پاريج الەمدى وليمپيادا ويىندارىندا ءۇشىنشى رەت قارسى الادى (جارىستار 1900 جانە 1924 -جىلدارى ءوتتى). سونىمەن قاتار، فرانسيا ءۇشىن بۇل التىنشى وليمپيادا بولادى: ەل ءۇش رەت قىسقى ويىنداردى ۇيىمداستىردى: شاموني-1924، گرەنوبل-1968 جانە البەرۆيل-1992.
ەسكە سالايىق، كاراتە العاش رەت توكيوداعى 2020 -جىلعى وليمپيادا ويىندارىندا ۇسىنىلعان بولاتىن. كاراتەشىلەر دارحان اسادىلوۆ پەن سوفيا بەرۋلسەۆا قازاقستانعا ەكى قولا مەدال الىپ كەلدى.
