قۋاتتى جەر سىلكىنىسىنەن زارداپ شەككەن گايتي تۇرعىندارىنا تاعى دا قاۋىپ ءتوندى
جەكسەنبى كۇنى گايتيدىڭ قۇتقارۋ قىزمەتى سوڭعى دەرەكتەر بويىنشا جەر سىلكىنىسىنەن ەلدە 1297 ادامنىڭ قازا تاپقانىن حابارلادى. 6 مىڭنان استام ءتۇرلى دارەجەدە جاراقات العان. گايتيدىڭ قۇتقارۋ قىزمەتىنىڭ باسشىسى دجەرري چاندلەر وڭىردەگى اۋرۋحانالار جاراقات العان ادامدارعا تولى ەكەنىن حابارلادى. CNN تەلەارناسى اۋرۋحانادا ورىن جەتىسپەۋشىلىگى سالدارىنان مەديتسينا ماماندارىنا دالاعا شاتىر قۇرۋعا تۋرا كەلگەنىن حابارلادى.
«قازىرگى باستى ماسەلە - مەديتسينالىق قاجەتتىلىكتەرمەن قامتاماسىز ەتۋ. ءبىز جەر سىلكىنىسىنەن زارداپ شەككەندەر جاتقان اۋرۋحانالاردىڭ قىزمەتكەرلەرىنە ءدارى-دارمەك جىبەرىپ جاتىرمىز. شۇعىل كومەكتى قاجەت ەتەتىن ادامداردى ەۆاكۋاتسيالادىق. ادامداردى ەۆاكۋاتسيالاۋ بۇگىن دە ەرتەڭ دە جالعاسادى»، - دەدى باسپا ءسوز ءماسليحاتىندا گايتيدىڭ پرەمەر-ءمينيسترى اريەل انري. ءزىلزالانىڭ وشاعى پتي-ترۋ-دە-نيپپ قالاسىنان شامامەن 8 ك م قاشىقتىقتا بولعان، جەر سىلكىنىسىنىڭ ماگنيتۋداسى 7,2. ءزىلزالانىڭ ءدۇمپۋى گايتيدىڭ ادامدار تىعىز قونىستانعان استاناسى پورت-و-پرەنسە (125 قاشىقتىقتا) مەن كورشىلەس ەلدەردە دە سەزىلگەن. قازىر وڭىردە جەر دۇمپۋلەرى قايتالانۋدا. ولاردىڭ ەڭ قۋاتتىلارىنىڭ ءبىرى سەنبى كۇنى كەشكىسىن بولدى. ا ق ش-تىڭ گەولوگيالىق قىزمەتىنىڭ دەرەكتەرىنشە، جەر ءدۇمپۋىنىڭ قۋاتى 5,8 بالل بولعان. ونىڭ سالدارىنان قانشالىقتى شىعىن كەلگەنى ازىرگە بەلگىسىز. پرەمەر انري اپات بولعان ايماقتى تىكۇشاقپەن شولىپ شىعىپ، ايماقتا 1 ايعا توتەنشە جاعداي جاريالادى.
جەر سىلگىنگەن ايماقتا قۇتقارۋ جۇمىستارىنا تاعى ءبىر قاۋىپ كەدەرگى كەلتىرۋى مۇمكىن.
مەتەورولوگتاردىڭ حابارلاۋىنشا، گايتي «گرەيس» داۋىلىنىڭ تراەكتورياسىندا تۇر، سول سەبەپتى دۇيسەنبى نەمەسە سەيسەنبى كۇندەرى بۇل ايماقتا وتە مول كولەمدە نوسەر جاۋىن جاۋىپ، سۋ تاسىپ، كوشكىن ءجۇرۋى مۇمكىن.
