ءتورت كۇن تويعا بارىپ ەدىم - كوروناۆيرۋسپەن اۋىرعان جامبىلدىق وكىنىشىن ءبىلدىردى
65 جاستاعى جامبىل اۋدانىنىڭ تۇرعىنى شىلدە ايىنىڭ ورتاسىندا جامبىل وبلىستىق كوپبەيىندى اۋرۋحاناسىنىڭ جۇقپالى اۋرۋلار قۇرىلىمىنا تۇسكەن. اۋرۋحاناعا تۇسكەن كەزدەگى جاعدايى تىم اۋىر ەدى. وعان قوسا ناۋقاستا قانت ديابەتى، ارتەريالدى گيپەرتەنزيا، تىنىس الۋ جەتىسپەۋشىلىگىنىڭ I -دارەجەسىمەن قاتار ينتوكسيكاتسيالىق سيندرومنىڭ بولۋىنا بايلانىستى جانساقتاۋ بولىمىندە باقىلاۋدا بولدى. تۇسكەن كۇننەن باستاپ، تىنىس الۋ جەتىسپەۋشىلىگى ІІ ,ІІІ -دارەجەگە دەيىن تومەندەپ، جاساندى تىنىس الۋ اپپاراتىنا قوسىلعان. دەر كەزىندە جۇرگىزىلگەن كەشەندى ەمنىڭ ارقاسىندا پاتسيەنتتىڭ جاعدايى جاقسارعان.
ناۋقاستىڭ ءومىرىن امان الىپ قالۋ ءۇشىن دارىگەرلەر ونى ەكى اپتا بويى ۇزدىكسىز باقىلاۋدا ۇستاپ، ءتيىستى ەم- شارالار رەتىن جۇرگىزىپ وتىردى. دەگەنمەن، قوسالقى اۋرۋلارى بولعاندىقتان، ارەڭ وزىنە كەلگەن انا ءتيىستى مەديتسينالىق شارالار ناتيجەسىن بەرگەن سوڭ ەسىن جيىپ، وزدىگىنەن دەم الۋعا كوشتى.
«جاز مەزگىلى توي مەزگىلى دەمەكشى، 4 كۇن قاتارىنان ۇيات بولماسىن دەپ بارعان ەدىم. بەسىنشى كۇنى دەنە قىزۋىم كوتەرىلىپ، السىزدىك بويىمدى باسىپ الدى. بۋىندارىم اۋىرا باستادى. ەل سالدىرىپ جاتقان ۆاكسينانى دا العان جوق ەدىم. ۇيدەن دارىلەر ءىشىپ، ۋكولدار قابىلدادىم. وزدىگىنەن جۇرگىزىلگەن ەمنەن جاعدايىم جاقسارماعان سوڭ، جەدەل جاردەم شاقىردىم. وسىلايشا اۋرۋىم ودان سايىن اسقىنىپ، جانساقتاۋ بولىمىنەن ءبىر-اق شىقتىم. مۇندا كەلگەندە ەكى جاقتى پنيەۆمونيا، وكپەنىڭ %76 قابىنۋى دەگەن دياگنوز قويىلدى. ەكى جەتى وكپەنى جاساندى جەلدەتۋ اپپاراتىنا قوسۋلى جاتتىم. دارىگەرلەردىڭ كۇش-جىگەرىنىڭ ناتيجەسىندە قاۋىپتى ۆيرۋستان امان قالدىم. مەنى بەيىندى بولىمشەنىڭ پالاتاسىنا اۋىستىردى، وندا ەمدەۋدى جالعاستىردىم. بارشا اق حالاتتىلارعا العىسىمدى بىلدىرەمىن»، - دەپ، اۋرۋحانادان شىعاردا اعىنان جارىلدى.
