زەينەتاقى جيناعىنا الىنعان ءۇيدى ساتۋعا بولا ما
وسى ورايدا كوپشىلىكتى زەينەتاقى قورى جيناعىنداعى تولەمگە الىنعان ءۇيدى ساتۋعا نەمەسە سىيعا تارتۋعا بولا ما دەگەن سۇراق تولعاندىرادى.
بۇل سۇراققا «وتباسى بانك» ا ق- نىڭ باسپا ءسوز حاتشىسى جانار جولتايەۆا جاۋاپ بەردى، دەپ حابارلايدى قازاقپارات ءتىلشىسى.
«زەينەتاقى جيناعىنا تۇرعىن ءۇي ساتىپ العان ازاماتتار اتالعان مۇلىكتى 5 جىلعا دەيىن ساتا المايدى دەگەن تالاپ بار. بۇل تالاپ زەينەتاقى جيناعىنداعى سومانى قولما-قول اقشاعا اينالدىرۋ، الىپ- ساتۋمەن اينالىسۋدىڭ جانە باسپانا باعاسىنىڭ نەگىزسىز ءوسۋىنىڭ الدىن الۋ ءۇشىن ەنگىزىلدى. ياعني بيىل 23-قاڭتاردان كەيىن وتەۋ مەرزىمى 5 جىلدان اساتىن يپوتەكالىق زايم راسىمدەلىپ، العاشقى جارنا رەتىندە ءبىرجولعى زەينەتاقى تولەمى پايدالانىلسا، وندا ول تۇرعىن ءۇيدى ساتۋعا رۇقسات جوق. الايدا يپوتەكالىق زايمدى وتەۋ مەرزىمى تۋرا 5 جىل نەمەسە ودان از بولسا وندا يەسى ءۇيدى ساتا الادى. سونداي- اق، تۇرعىن ءۇيدىڭ العاشقى جارناسى ءوتىنىش بەرۋشىنىڭ جەكە قاراجاتىمەن وتەلىپ، قالعانى يپوتەكا ارقىلى ءىشىنارا زەينەتاقى جيناعى قولدانىلسا ول جاعدايدا باسپانا يەسىنىڭ ساتۋ قۇقىعى بار. ساتۋدان بولەك، ءۇيدى ءوز جاقىندارىنا سىيعا دا بەرە الادى»، - دەدى جانار جولتايەۆا.
ونىڭ ايتۋىنشا، زەينەتاقى جيناعىنىڭ ءبىر بولىگىن جۇمساۋدا ادامنىڭ جاس ەرەكشەلىگى ماڭىزدى ەمەس. باستىسى ازاماتتىڭ كامەلەت جاسىندا بولۋى.
«كارانتينگە بايلانىستى بانكتە ادامداردىڭ شوعىرلانۋىنا جول بەرمەۋ ءۇشىن، بارلىق جۇمىس ونلاين ءجۇرىپ جاتىر. سول ءۇشىن دە زەينەتاقى جيناعىن تولەمدى الۋعا ارنالعان ارنايى پلاتفورما ىسكە قوسىلدى. ياعني ءوتىنىش بەرۋدەن باستاپ، بارلىق راسىمدەۋ، جەكە مالىمەتتەردى ەنگىزۋ سەكىلدى پروتسەستەر تولىقتاي سايت ارقىلى ۇيدە وتىرىپ تا جۇزەگە اسىرۋعا بولادى»، - دەيدى ول. بۇعان دەيىن حابارلاعانىمىزداي، بۇگىندە زەينەتاقى تولەمىن جۇمساۋ سالاسىنداعى رەفورمانىڭ يگىلىگىن كورگەن 147 مىڭنان استام وتانداسىمىز باسپانالى بولىپ وتىر.
