باقتيار ارتايەۆ وليمپيادادا قازاقستاندىق بوكسشىلاردىڭ التىن الماۋىنا نە كەدەرگى بولعانىن ايتتى

نۇر-سۇلتان. قازاقپارات - قازاقستان بوكس فەدەراتسياسىنىڭ باپكەرلىك ماسەلەلەر جونىندەگى ۆيتسە-پرەزيدەنتى، بوكستان ق ر قۇراماسىنىڭ مەملەكەتتىك جاتتىقتىرۋشىسى باقتيار ارتايەۆ وليمپياداداعى بوكسشىلاردىڭ ونەرىنە باعا بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا توكيودا وتكەن وليمپيادادا قازاقستاندىق بوكسشىلاردىڭ التىن مەدال الماۋىنا نە كەدەرگى بولعانى تۋرالى سۇرالدى.

«ءار نارسەنى ءوز اتاۋىمەن ايتاتىن ۋاقىت كەلدى عوي. وسى ورايدا ساتسىزدىك دەگەن ورىندى بولار، ياعني وتە تومەن ناتيجە. ەلىمىزدەگى 19 ميلليون جانكۇيەر بار ەكەنىن ەسكەرسەك، كوشەدەگى ادامدار بوكستىڭ احۋالىن تالقىلاپ جاتىر. سوندىقتان وتە ناشار كورسەتكىش. بۇل جەردە ەشكىم ەشكىمدى اقتايىن دەپ جاتقان جوق، ءوزىمىزدى اقتاۋدان اۋلاقپىز. جىگىتتەر قولىنان كەلگەنىن ءبارىن ىستەدى. اشىعىن ايتۋ كەرەك، ءبىز ادەتتەگىدەي باس باپكەرگە سەندىك. بۇل تۇرعىدا وسى سوزىممەن باس باپكەرگە بۇكىل جۇكتى ىسىرا سالىپ، ءوزىمىز سۋدان تازامىز دەپ ايتۋدان اۋلاقپىن. بۇل رەتتە جۇيەلى جۇمىس جاسالدى، بۇكىل جارىستارعا بارىپ، وقۋ- جاتتىعۋ جيىندارى ءوتتى»، - دەدى ب. ارتايەۆ.

وسى ورايدا توكيودا بوكسشىلار ەكى قولاعا قول جەتكىزگەنىن، الايدا ريو وليمپياداسىنداعىداي ناتيجە بولماعانىن ەسكە سالدى.

«مۇنداي كورسەتكىشكە قول جەتكىزە الماعاننان كەيىن، قازىر ەندى ساراپتاما جۇمىستارىن جۇرگىزۋ كەرەك. كوپ سۇراق تۋىندادى، ءۇش بالا ءوز ورنىنا بارا المادى دەگەن ءۋاج ايتىلدى»، - دەدى باقتيار ارتايەۆ.

اۆتور: رۋسلان عابباسوۆ