اۋعانستاندا تالىپتەر تاعى ءبىر قالانى باسىپ الدى

نۇر-سۇلتان.قازاقپارات -«تاليبان» كابۋلعا جاقىن ماڭداعى گازني قالاسىن باسىپ العانىن مالىمدەدى. بۇل تۋرالى حابار «اسسوشيەيتەد پرەسس» اگەنتتىگىندە جاريالاندى.

اۋعان بيلىگىنىڭ مالىمەتى بويىنشا، تالىپتەر قالاداعى باستى مەكەمەلەر - گۋبەرناتوردىڭ كەڭسەسى، پوليتسيا ۋچاسكەسى مەن تۇرمەنى ءوز باقىلاۋىنا العان. الەۋمەتتىك جەلىلەردە تارالعان ۆيدەولاردا تالىپتەردىڭ كوشەدە ەمىن- ەركىن جۇرگەنى كورىنىپ تۇر.

ەلدىڭ قورعانىس مينيسترلىگى قارۋلى قاقتىعىس كەزىندە كۇنىنە 200 دەن كوپ سودىردىڭ كوزى جويىلىپ جاتقانىن ايتادى. قازىر سوعىس قيمىلدارى بىرنەشە پروۆينتسيادا قاتار ءجۇرىپ جاتىر. سونداي- اق «ءال- جازيرا» ارناسىنىڭ حابارلاۋىنشا، اۋعانستان ۇكىمەتى تالىپتەرگە زورلىق- زومبىلىقتى توقتاتىپ، ەل باسقارۋ ىسىنە قاتىسۋدى ۇسىنعان.

ايتا كەتەيىك، اۋعانستانداعى جاعداي ا ق ش اسكەرىن اكەتە باستاعان كەزدەن ۋشىقتى. كەيبىر دەرەك كوزدەرى بويىنشا، تالىپتەر ەل اۋماعىنىڭ 65 پروتسەنتىن جاۋلاپ العان.

www.24.kz