پاۆلودار وبلىسىندا كىسى ولتىرگەن ادام مەكتەپ ديرەكتورى بولىپ جۇمىس ىستەيدى

نۇر-سۇلتان. قازاقپارات - پاۆلودار وبلىسىندا سىبايلاس جەمقورلىققا قارسى كۇرەس قىزمەتكەرلەرى ەكى مەكتەپ ديرەكتورىنىڭ بۇرىن ءىستى بولعاندارىن انىقتادى.

ۆەدومستۆو قىزمەتكەرلەرى ءبىلىم بەرۋ سالاسىنداعى سىبايلاس جەمقورلىقتى انىقتاۋ كەزىندە، 10 جىل بويى وقۋ ورنىن باسقارعان ديرەكتورلاردىڭ ءبىرى 90-جىلدارى قاساقانا كىسى ولتىرگەنى ءۇشىن سوتتالعانى بەلگىلى بولدى.

«اققۋلى اۋدانى ب. ۋاحاتوۆ اتىنداعى مەكتەپ ديرەكتورى ە. ك. دۇيسەنوۆ بۇعان دەيىن قاز س س ر ق ك- نىڭ 88-بابى 2-بولىگى «قاساقانا كىسى ءولتىرۋ« بويىنشا سوتتالعان. ەڭبەك كودەكسىنىڭ 26-بابى بويىنشا كامەلەتكە تولماعانداردىڭ، سوتتىلىعى بار نەمەسە بولعان، ادام ءولتىرۋ، دەنساۋلىققا قاساقانا زيان كەلتىرۋ، حالىقتىڭ دەنساۋلىعىنا جانە يماندىلىققا، جىنىستىق قولسۇعىلماۋشىلىققا قارسى قىلمىستىق قۇقىق بۇزۋشىلىقتارى ءۇشىن قىلمىستىق قۋدالاۋعا ۇشىراعان ادامداردىڭ ءبىلىم بەرۋ، تاربيەلەۋ جانە دامىتۋ ۇيىمدارىنا جۇمىسقا ورنالاسۋىنا جول بەرىلمەيدى»، - دەدى وبلىستىق سىبايلاس جەمقورلىققا قارسى كۇرەس دەپارتامەنتى باسشىسىنىڭ مىندەتىن اتقارۋشى ارداق بالعوجين.

ۆەدومستۆو وكىلىنىڭ ايتۋىنشا، اۋىر قىلمىسى ءۇشىن سوتتالعان ديرەكتور جۇمىستان شىعارىلعان. الايدا وقۋ ورنىنىڭ رەسمي پاراقشاسىندا دۇيسەنوۆ مەكتەپ ديرەكتورى قىزمەتىن جالعاستىرعانىن كورۋگە بولادى.

«ەرجان قۇسمان ۇلى جۇمىستان بوساتىلعان جوق. ءيا، ول قازاق ك س ر-ى كەزىندە قىلمىستىق جاۋاپكەرشىلىككە تارتىلعان، 1996 -جىلى ول وسى مەكتەپتىڭ ديرەكتورى بولىپ تاعايىندالدى، ودان كەيىن قاراپايىم مۇعالىم بولىپ جۇمىس ىستەدى. 2011 -جىلى ول قايتادان مەكتەپ ديرەكتورى بولىپ تاعايىندالدى، ال 2018 -جىلى وقۋ ورنىن قايتا تىركەۋگە بايلانىستى قايتا تاعايىندالدى. مىنە، قازىرگى تاڭدا ديرەكتور بولىپ جۇمىس ىستەيدى»، - دەدى اۋداندىق ءبىلىم ءبولىمىنىڭ سەكتور مەڭگەرۋشىسى دينارا قوبايداروۆا.

ءبىلىم بەرۋ ءبولىمى سىبايلاس جەمقورلىققا قارسى كۇرەس قىزمەتكەرلەرى سىلتەمە جاسايتىن ەڭبەك زاڭناماسىنداعى وزگەرىستەر، مەكتەپ ديرەكتورى قىلمىستىق جاۋاپكەرشىلىككە تارتىلعاننان كەيىن قابىلدانعاندىقتان دۇيسەنوۆ ودان ءارى جۇمىس ىستەي بەرەدى دەپ سانايدى.

«ەڭبەك كودەكسىنە وزگەرىستەر تەك 2015 -جىلى عانا ەنگىزىلدى. ەگەر ونى جۇمىستان شىعارار بولساق، ول كەز كەلگەن جاعدايدا سوتقا شاعىمدانىپ، ءوز ورنىن تالاپ ەتە الادى. سول كەزدە ءبىز قاتەلەسكەن بولامىز. سەبەبى، زاڭنىڭ كەرى كۇشى جوق»، - دەدى دينارا قوبايداروۆا.

الايدا سىبايلاس جەمقورلىققا قارسى كۇرەس 90- جىلدارداعى ەڭبەك كودەكسى اۋىر قىلمىستار ءۇشىن، اسىرەسە بالالارمەن جۇمىس ءۇشىن سوتتالعان ادامداردى باسقارۋ ورىندارىنا قابىلداۋعا تىيىم سالعانىن ايتتى.

سونداي-اق، تەكسەرىس بارىسىندا باسقا مەكتەپتىڭ ديرەكتورىن بۇرىن سىبايلاس جەمقورلىققا قارسى جاۋاپقا تارتىلعانىن بىلگەننەن كەيىن، زەينەتكەرلىككە شىعۋىنا ءبىر جىل قالعانىنا قاراماستان جۇمىستان شىعارعان.

kaz.tengrinews.kz