ساۋدا ءمينيسترى ازىق-تۇلىك باعاسىنىڭ ءوسۋىن تەجەۋدىڭ شۇعىل ءادىسىن ايتتى

نۇر-سۇلتان. قازاقپارات - بۇگىن ۇكىمەت وتىرىسىندا جەتى ايداعى الەۋمەتتىك-ەكونوميكالىق دامۋدى تالقىلاۋ كەزىندە ق ر ساۋدا جانە ينتەگراتسيا ءمينيسترى باقىت سۇلتانوۆ ازىق-تۇلىك باعاسىنىڭ ءوسۋىن تەجەۋ ءۇشىن قانداي قادامدار جاساۋ كەرەك ەكەنىن ايتتى، دەپ حابارلايدى قازاقپارات ءتىلشىسى.

«باعانىڭ ودان ءارى وسۋىنە جول بەرمەۋ ءۇشىن شۇعىل تۇردە ءتيىستى شارالاردى قابىلداۋ قاجەت دەپ پايىمدايمىز. بىرىنشىدەن، اكىمدىكتەر بيزنەس سۋبەكتىلەرىنىڭ ۇستەمە اقىلار مەن شەكتى باعالاردان اسىپ كەتۋىنە جول بەرمەۋگە مونيتورينگ پەن باقىلاۋدى كۇشەيتۋدى، سونداي-اق ءوڭىر تۇرعىندارىنا بەلگىلەنگەن شەكتى باعالار تۋرالى حاباردى دەر كەزىندە جەتكىزۋدى تاپسىرۋدى سۇرايمىن. ەكىنشىدەن، الەۋمەتتىك - كاسىپكەرلىك كورپوراتسيالار اراسىندا تاۋار جەتكىزۋ جونىندە ناقتى ءوڭىرارالىق كووپەراتسيانى قامتاماسىز ەتۋ قاجەت. بۇل رەتتە اۋىل شارۋاشىلىعى مينيسترلىگىنە تۇراقتاندىرۋ قورلارىنا تاۋارلاردى ءوزارا جەتكىزۋدى جۇزەگە اسىرۋعا مۇمكىندىك بەرەتىن ەرەجەلەرگە وزگەرىستەر ەنگىزۋدى تاپسىرۋدى سۇرايمىن»، - دەدى ب. سۇلتانوۆ ۇكىمەت باسشىسىنا قاراتا ايتقان سوزىندە.

ونىڭ ايتۋىنشا، قىركۇيەك پەن جەلتوقسان ارالىعىندا شەكارالاس ەلدەر تاراپىنان كوكونىسكە دەگەن سۇرانىستىڭ ارتۋى بايقالادى.

«ءونىمنىڭ باقىلاۋسىز ەلدەن شىعارىلۋى ورىن العان جاعدايدا، وسى تاۋارلار ەكسپورتىن كۆوتالاۋدى ەنگىزۋ قاجەت. سونداي-اق كوكونىس پەن جەمىس- جيدەك قويمالارىنىڭ فيزيكالىق جانە مورالدىق تۇرعىدان ەسكىرگەنىن ەسكەرە وتىرىپ، ينۆەستيتسيالىق سۋبسيديالاۋ نورماسىن %25 دان %50 عا دەيىن ۇلعايتۋ قاجەت. بۇل ۇكىمەتتىڭ كەڭەيتىلگەن وتىرىسىندا مەملەكەت باسشىسى بەرگەن تاپسىرمانى ورىنداۋ اياسىندا قاجەت جانە بيزنەستى ىنتالاندىرۋعا، ەگىندى جەتكىلىكتى مولشەردە ساقتاۋعا ءارى باعانىڭ كۇرت كوتەرىلۋىنە جول بەرمەۋگە مۇمكىندىك بەرەدى»، - دەدى مينيستر.