ءدال قازىرگى قازاقستان ەكونوميكاسىنىڭ ءوسۋ قارقىنى قانشا پايىزدى قۇرايدى
بۇل تۋرالى ۇكىمەت وتىرىسىندا بيىلعى جەتى ايداعى الەۋمەتتىك- ەكونوميكالىق دامۋدى تالقىلاۋ كەزىندە ۇلتتىق ەكونوميكا ءمينيسترى اسەت ەرعاليەۆ ءمالىم ەتتى، دەپ حابارلايدى قازاقپارات ءتىلشىسى.
«وسى جىلدىڭ قاڭتار- شىلدە ايلارىندا قازاقستان ەكونوميكاسىنىڭ ءوسۋ قارقىنى 2,7 پايىزدى قۇرادى. وسى ەسەپتى كەزەڭدە نەگىزگى ترەندتەر بويىنشا ناقتى سەكتورداعى ديناميكالىق جانە تۇراقتى ءوسۋ، قىزمەت كورسەتۋ سەكتورىنداعى ديناميكانىڭ جەدەلدەۋى، ءوندىرۋشى ەمەس سەكتورلارداعى ينۆەستيتسيانىڭ جوعارى ءوسۋى، ساۋدا بالانسىنىڭ وڭ سالدوسىنىڭ ساقتالۋى بايقالۋدا. ناقتى سەكتور ەكونوميكانىڭ ورنىقتى دامۋ فاكتورى بولىپ وتىر. وسى جىلدىڭ قاڭتار- شىلدەسىندە ناقتى سەكتورداعى ءوسىم 3,6 پايىزعا دەيىن جەدەلدەدى»، - دەدى مينيستر.
ونىڭ ايتۋىنشا، ىسكەرلىك بەلسەندىلىك قىزمەت كورسەتۋ سالاسىندا %2 عا دەيىن ءوستى. سالالار اراسىندا اقپارات جانە بايلانىس، قۇرىلىس، ساۋدا، سۋمەن جابدىقتاۋ، وڭدەۋ ونەركاسىبى، ەلەكترمەن جابدىقتاۋ جوعارى ءوسىم كورسەتۋدە. سونداي-اق، اۋىل شارۋاشىلىعىندا دا جاقسى ءوسىم بايقالىپ وتىر.
