نۇريسلام سانايەۆقا ەكى بولمەلى پاتەر بەرىلدى

اقتوبە. قازاقپارات - توكيو وليمپياداسىنىڭ قولا جۇلدەگەرى نۇريسلام سانايەۆقا ءوڭىر باسشىسى وڭداسىن ورازالين پاتەر كىلتىن تابىس ەتتى، دەپ حابارلايدى قازاقپارات ءتىلشىسى ءوڭىر باسشىسىنىڭ باسپا ءسوز قىزمەتىنە سىلتەمە جاساپ.

وبلىس اكىمى وڭداسىن ورازالين بۇگىن توكيودا وتكەن جازعى وليمپيادا ويىندارىنان ورالعان اقتوبەلىك سپورتشىلارمەن جانە ولاردىڭ جاتتىقتىرۋشىلارىمەن كەزدەستى. وليمپيادانىڭ قولا جۇلدەگەرى نۇريسلام سانايەۆقا ەكى بولمەلى پاتەر كىلتىن سىيلادى. وليمپيادا ويىندارىنا قاتىسقان بالۋان مەيرامبەك ايناعۇلوۆقا، سۋدا ءجۇزۋشى ديانا نازاروۆاعا، سونىمەن قاتار، سپورتشىلاردىڭ جاتتىقتىرۋشىلارىنا ءوڭىر باسشىسى باعالى سىيلىقتار تابىستادى.

«سىزدەر - ەلىمىزدىڭ ماقتانىشىسىزدار. جاس ۇرپاققا سالاۋاتتى ءومىر سالتى مەن سپورتتى دارىپتەۋدە ۇلگى بولا وتىرا باعا جەتپەس ۇلەس قوساسىزدار. ادال ءارى ايانباي كۇرەسكەندەرىڭىز ءۇشىن، باتىلدىقتارىڭىز بەن وتان سۇيگىشتىكتەرىڭىزگە شىن جۇرەكتەن العىس ايتامىن»،-دەدى وڭداسىن ورازالين. وليمپياداعا قاتىسۋشىلار وبلىس باسشىلىعىنا كاسىبي سپورتتى قولداعانى ءۇشىن العىس ايتىپ، جوسپارلارىمەن ءبولىستى.

«قولداعانى ءۇشىن حالقىما شەكسىز ريزامىن. جەرلەستەرىمنىڭ قالاي قارسى العاندارىن كورىپ، وليمپيادا جۇلدەگەرى بولعانىمدى انىق سەزىندىم. وتانداستارىمدى پاريجدە وتەتىن وليمپيادادا التىن القامەن قۋانتۋ ءۇشىن بۇدان دا كوپ دايىندالاتىن بولامىن»،-دەدى نۇريسلام سانايەۆ.

ايتا كەتەيىك، پالۋان يۋسۋپ باتىرمىرزايەۆ پەن كاراتەشى نۇرقانات ءاجىقانوۆ، سونىمەن قاتار توكيوداعى وليمپيادا ويىندارىندا اقتوبە وبلىسى اتىنان شىققان باسقا دا سپورتشىلار تۋعان جەرگە 11 -تامىزدا ورالادى. سونىمەن بىرگە سۋدا ءجۇزۋشى ۆيتالي حۋدياكوۆ ىستىق كول جانىندا ءوتىپ جاتقان وقۋ-جاتتىعۋ جيىنىنا كىرىسىپ تە كەتكەن.