ارنايى وپەراتسيا: ەلوردادا ءىرى كولەمدە ەسىرتكى تاركىلەندى

نۇر- سۇلتان. قازاقپارات - ەلوردا پوليتسەيلەرى قالاعا ەسىرتىكى زاتتارىن جەتكىزەتىن ارنانى اشكەرەلەدى، دەپ حابارلايدى قازاقپارات.

« 7- تامىز كۇنى ەسىرتكىنى جەتكىزۋ مەن ساتۋ ارناسىنا توسقاۋىل قويۋعا باعىتتالعان جەدەل ىزدەستىرۋ ءىس- شاراسى كەزىندە 37 جاستاعى ەر ادام ۇستالدى. ونى تەكسەرۋ بارىسىندا 2 كەلى گاشيش تاركىلەندى»، - دەلىنگەن پوليتسيا دەپارتامەنتى مالىمەتىندە.

ونى ۇستاۋ كەزىندە كۇدىكتى ءىزىن سۋىتپاق بولعان. سونىمەن قاتار، قوسشىدا تۇراتىن ءۇيىن تەكسەرۋ كەزىندە ارنايى جابدىقتالعان جاسىرىن قويمادا ەكى پوليەتيلەن پاكەتتە 34 كەلىدەن استام گاشيش انىقتالدى.

بەلگىلى بولعانداي، كۇدىكتى اتالعان ەسىرتكىنى ەلوردا اۋماعىندا وتكىزۋدى جوسپارلاعان. ارنايى وپەراتسيا ناتيجەسىندە زاڭسىز اينالىمنان 36,3 كەلى گاشيش تاركىلەندى. بۇل فاكتى بويىنشا قىلمىستىق ءىس قوزعالىپ، كۇدىكتى قاماۋعا الىندى.

اۆتور: رۋسلان عابباسوۆ