ديماش قۇدايبەرگەن اقتوبەدە ءوتىپ جاتقان «باقىتتى بالا» فەستيۆالىنە كەلدى - ۆيدەو
ول گالا كونسەرتتە ونەر كورسەتەدى، دەپ حابارلايدى قازاقپارات ءتىلشىسى.
اقتوبەدە Baqytty Bala بايقاۋى باستالدى. وعان الەمنىڭ 7 ەلىنەن ونەرپازدار قاتىسىپ جاتىر. «بارلىعى 200 گە جۋىق ادامنان ءوتىنىش ءتۇستى. ونىڭ 20 سى ىرىكتەلىپ، شاقىرىلدى. بايقاۋ «حابار» ارناسى مەن «ديماش الي» شىعارماشىلىق ورتالىعىنىڭ ۇيىمداستىرۋىمەن ءوتىپ جاتىر. وبلىس اكىمدىگى قولدادى. 2018 -جىلى بايقاۋعا قاتىسۋعا 420، 2019 -جىلى 500 دەن استام ادام ءوتىنىش بەرىلدى. بۇل سايىستىڭ سالماعىن بىلدىرەدى»، - دەدى وبلىستىق مادەنيەت باسقارماسىنىڭ باسشىسى التىناي يۋنيسوۆا.
بايقاۋ ەكى كەزەڭنەن تۇرادى. ىرىكتەۋدەن ءوتىپ، فينالعا شىققاندار ەكى ءان ورىندايدى. ءبىرى انا تىلىندە، ەكىنشىسى شەتەل تىلىندە. گالا كونسەرتتە «سلاۆيان بازارى» بايقاۋىنىڭ جەڭىمپازى رۋحيا بايدۇكەنوۆا، Junior Eurovision بايقاۋىنىڭ جۇلدەگەرى قاراقات باشانوۆا ءان شىرقايدى.
سونىمەن بىرگە «باقىتتى بالا» بايقاۋىنىڭ بۇعان دەيىنگى جەڭىمپازدارى ساحناعا شىعادى. «بالالارعا ساتتىلىك تىلەيمىن. امان بولسىن. ەلىمىزدىڭ ابىرويىن اسقاقتاتسىن»، - دەيدى ءانشى ديماش قۇدايبەرگەن.
اۆتور: التىناي ساعىندىقوۆا
