سولتۇستىك قازاقستاندا قۇتىرما اۋرۋى تىركەلگەن اۋىلعا شەكتەۋ شارالارى ەنگىزىلدى
س ق و ۆەتەريناريا باسقارماسىنىڭ مالىمەتىنشە، ەسىل اۋدانى بىرلىك اۋىلىندا تۇلكىنىڭ ولەكسەسى تابىلعان. وقيعا ورنىنا جەتكەن ماماندار ساراپتاما الىپ، ءتۇز تاعىسىنىڭ قۇتىرما اۋرۋىنان ولگەنىن انىقتادى.
«قۇتىرما اۋرۋىنىڭ تابىلۋىنا بايلانىستى اۋىلعا شەكتەۋ شارالارى ەنگىزىلدى. دەزينفەكتسيا جۇرگىزىلدى. يت- قۇسقا، مالعان جۇقپالى اۋرۋعا قارسى ۆاكتسينا ەگىلدى. قازىر جاعدايدى باقىلاۋدا ۇستاپ وتىرمىز. تۇلكىنىڭ ولەكسەسى ءساۋىر ايىندا تابىلعان ەدى. اۋىلدىق وكرۋگ اكىمىنىڭ شەكتەۋ شارالارىن ەنگىزۋ تۋرالى شەشىمى ادىلەت ورگاندارىندا ۇزاق ۋاقىت بويى تىركەۋدە جاتتى. سوندىقتان بۇل شارالار ەندى عانا قولعا الىنىپ جاتىر»، - دەيدى سقو ۆەتەريناريا باسقارماسىنىڭ ءبولىم جەتەكشىسى قايىرلى قازانوۆ.
جالپى س ق و- دا بيىلدىققا مال مەن ءۇي جانۋارلارىنىڭ قۇتىرماعا شالدىعۋىنىڭ 11 دەرەگى تىركەلدى. جۇقپالى اۋرۋدىڭ الدىن الۋ ماقساتىندا 26 مىڭ مالعا ەكپە سالىندى.
جىل سوڭىنا دەيىن تاعى 30 مىڭنان استام ءۇي جانۋارىنا ۆاكسينا ەگىلمەك. بۇعان دەيىن ءۋاليحانوۆ اۋدانى مورتىق اۋىلىندا ون شاقتى بۇزاۋدىڭ قاراسانعا ۇقساس اۋرۋدان قىرىلعانىن ايتقان ەدىك.
