ستۋدەنتتەرگە ۆاكسينا الۋ مىندەتتى مە

نۇر- سۇلتان. قازاقپارات - ەلىمىزدە ستۋدەنتتەرگە ۆاكسينا الۋ مىندەتتى مە؟ بۇل سۇراققا قاتىستى ەلوردادا قۇزىرلى مەكەمە وكىلى مەن مەديتسينا مامانى ءوز پىكىرىن ءبىلدىردى، دەپ حابارلايدى قازاقپارات ءتىلشىسى.

ايتا كەتسەك، ءبىزدىڭ رەداكسيامىزعا جاسى 18-گە تولعان ستۋدەنتكە ۆاكسينا الۋ مىندەتتى مە، ول تۋرالى قايدان بىلۋگە بولادى دەگەن ساۋال كەلىپ ءتۇستى. ءبىز جاۋاپتى مامانداردان سۇراپ كوردىك.

«ستۋدەنتتىڭ جاسى 18-گە تولماعان بولسا ۆاكسينا الۋ مىندەتتى ەمەس، ال كامەلەت جاسىنا (18 جاسقا) تولعان ستۋدەنتتىڭ ۆاكسينا الۋىنا رۇقسات. ارينە، ستۋدەنتتىڭ ەركىنە ساي»، - دەدى نۇر- سۇلتان قالاسى قوعامدىق دەنساۋلىق ساقتاۋ باسقارماسىنىڭ باسپا ءسوز حاتشىسى ايگەرىم ارداق.

سونداي- اق، دەنساۋلىق ساقتاۋ باسقارماسىنىڭ وكىلى، مەملەكەتتىك باس سانيتار دارىگەردىڭ قاۋلىسىندا ازاماتتاردىڭ ۆاكسينا الۋ قۇقىعى تولىقتاي كورسەتىلگەنىن ايتتى. وسى ورايدا ءبىز دارىگەر ماماننىڭ دا پىكىرىنە سۇيەنۋدى ءجون كوردىك.

«ۆاكسينا ادامدى ىندەتتەن قورعاۋدا % 90 كەپىلدىك بەرەدى، قالعانى ءار ادامنىڭ اعزاسىنا بايلانىستى. حالىق اراسىندا ءجيى كەزدەسەتىن قاتەلىكتەردىڭ ءبىرى - «ۆاكسينا الدىم» دەيدى دە، سول ساتتەن باستاپ ماسكا تاقپاي، ارا قاشىقتىقتى ساقتاماي، توي- جيىنعا بارىپ جۇرە بەرەدى. ۆاكسينانى تولىقتاي العاننىڭ وزىندە انتيدەنە 2 ايعا دەيىن ساقتالادى. وسىنى ۇمىتپاعان ءجون. ياعني، ىندەتكە شالدىقپاۋ نەمەسە ودان قورعانۋ ۆاكسينا الۋمەن عانا شەكتەلمەيدى»، - دەدى ەلوردالىق جالپى تاجىريبە دارىگەرى، نۇر- سۇلتان قالاسى №11 ەمحانانىڭ ءبولىم مەڭگەرۋشىسى ايدانا ايازبەك قىزى.

ودان بولەك، دارىگەر مامان ۆاكسيناعا قاتىستى ءتۇرلى جاڭساق پىكىردەن اۋلاق بولۋعا شاقىردى. «ءيا، ەكپە العانىنا قاراماستان اتالعان ىندەتكە قايتا شالدىعىپ جاتقاندار بار. حالىق اراسىندا «ەكپە الدىم، ءبىتتى، ەندى ەشقاشان اۋىرمايمىن» دەگەن جاڭساق پىكىر بار، ودان اۋلاق بولايىق. دەنساۋلىق پەن اعزانىڭ ساۋلىعى تەك ۆاكسينا الۋمەن شەكتەلمەيدى. ۆاكسينا - دەنساۋلىق پەن اعزانىڭ ساۋلىعىن ساقتاۋدىڭ ءبىر جولى عانا»، - دەيدى ول.

اۆتور: ءالي يبرايەۆ