قىتايدا ىندەت قايتا كۇشەيدى
«دەلتا» شتامىنىڭ ءورشۋى نانكين قالاسىنا شەتەلدەن كەلگەن ۇشقىشتان باستالىپ، تالاي ايماقتارعا تارادى. وسىعان بايلانىستى قالانىڭ ءبىرقاتار شەنەۋنەكتەرى مەن اۋەجايدىڭ باسشىسى جۇمىستان قۋىلدى.
دەگەنمەن، كەي ايماقتاردا اۋرۋدىڭ كەڭ تارالۋىنا نانكيندەگى جاعدايدىڭ قاتىسى جوق. مىسالى، شانحاي مەن سۋ تاسقىنىنان زارداپ شەككەن چجەنجوۋ قالالارىندا ىندەت كۇشەيدى. جالپى قازىر COVID-19 ەلدىڭ 17 وڭىرىندە تىركەلدى، شىلدەنىڭ اياعىنان باستاپ 500-دەن اسا تۇرعىن ۆيرۋس جۇقتىردى. كولىك قاتىناستارى ازايتىلىپ، جاپپاي تەست تاپسىرۋ، قاتاڭ كارانتين شارالارى قولعا الىندى.
حە سينحۋا، ق ح ر دەنساۋلىق ساقتاۋ بويىنشا مەملەكەتتىك كوميتەتىنىڭ ينسپەكتورى:
- ورىن العان جاعدايعا سۇيەنسەك، ىندەتتى جالپى توقتاتۋعا بولادى. الايدا اۋرۋدىڭ كوپتەگەن ايماققا تارالۋى، جەرگىلىكتى ينفەكسيانىڭ ءورشۋى ۆيرۋستى تەجەۋگە قيىندىق تۋعىزىپ جاتىر. دەگەنمەن، اۋرۋدى الدىن الۋ جانە باقىلاۋ شارالاردى دۇرىس ساقتاعان جاعدايدا، ىندەتتى ەكى- ءۇش ينكۋباتسيالىق كەزەڭدە توقتاتۋعا بولادى.
امەريكالىق بۇقارالىق اقپارات قۇرالدارىنىڭ حابارلاۋىنشا، ەلدىڭ بارلاۋ قىزمەتى ۋحان زەرتحاناسىنداعى ۆيرۋستار تۋرالى گەنەتيكالىق مالىمەتتەردى قولعا ءتۇسىردى. وسى اقپارات ىندەت قوزدىرعىشىن انىقتاۋعا مۇمكىندىك بەرەتىنىن ايتادى. ال، قىتاي باسپا ءسوزى بۇل دەرەكتى جالعان ءارى ەلىن قارالاۋعا باعىتتالعان دەپ وتىر. سونداي- اق قىتايدا 25 ميلليوننان استام تۇرعىن ا ق ش فورت- دەتريك اتالاتىن زەرتحانانى تەكسەرۋ تۋرالى دۇنيەجۇزىلىك دەنساۋلىق ساقتاۋ ۇيىمىنا ونلاين پەتيتسياعا قول قويدى. ولاردىڭ ايتۋىنشا، سول مەكەمەدە قاۋىپتى ۆيرۋستار ساقتاۋلى، ال 2019 -جىلى ىندەتتىڭ الدىندا عانا ءدال سول زەرتحانادان ۆيرۋس سىرتقا تاراعان بولاتىن.
