توكيو وليمپياداسى نەسىمەن ەستە قالدى
ەكى اپتادان استام ۋاقىت جالعاسقان ءدۇبىرلى دودادا قۋانىش پەن شاتتىق، رەنىش پەن وكىنىش، حالىقتى تاڭقالدىرعان ساتتەر دە بولدى.
بار سپورتشىنىڭ ارمانى - وليمپيادا مەدالى. ال ونى دايىنداۋدىڭ دا ءوز ءادىسى بار. ءتۇرلى تەحنيكالار قولدانىلىپ، جاڭارتىلىپ تا وتىرادى. بۇل ىستە دە جاپوندىقتار ءدۇيىم جۇرتتى تاڭقالدىردى. ياعني مەدالداردى قوقىستان قۇراپ شىقتى.
ول ءۇشىن جەرگىلىكتى ونەرتاپقىشتار بۇكىل ەلدەن ەسكى تەلەفوندار مەن SIM كارتالار، تەحنيكالىق بۇيىمداردى مەملەكەتكە قايىرىمدىلىق كومەك رەتىندە تاپسىرۋدى سۇراعان. مۇنداي قۇرىلعىلاردىڭ كەي بولىگى التىن، كۇمىستەن قۇيىلاتىنىن جاقسى بىلەتىن ماماندار اقىرىندا سول جيىلعان قالدىقتان 32 كەلى التىن، 3 جارىم كەلى كۇمىس، 2 كەلى 400 گرام مىس العان.
توكيو وليمپياداسىنىڭ تاريحي وقيعالارعا دا تولى بولعانى بەلگىلى. سونىڭ ءبىرى گرۋزين سپورتشىسى نينو سالۋكۆادزەمەن بايلانىستى. ول توعىز رەت وليمپياداعا قاتىسقان الەمدەگى تۇڭعىش ايەل اتاندى. پنيەۆماتيكالىق تاپانشادان وق اتۋدان سىنعا تۇسەتىن نينو العاش رەت 1988 -جىلى سەۋل وتكەن بايراقتى باسەكەدە ونەر كورسەتكەن. سودان بەرى وليمپيادا ويىندارىنان مەدالسىز ورالماپتى. 52 جاستاعى سپورتشى تەك بيىل عانا جۇلدەلى ورىنعا ىلىگە الماي، سپورتتىق مانسابىن اياقتادى.
توكيودا بىرەۋلەر جۇرتتى سپورتتاعى مانسابىمەن تاڭقالدىرسا، ەندى ءبىرى وليمپيادا الاڭىندا سۇيىكتى حوببيىمەن اينالىسىپ، كورەرمەندەردى ءتانتى ەتتى. اتاپ ايتقاندا، سۋعا سەكىرۋدەن التىن العان بريتاندىق توم دەيلي توقىما توقىپ، كوپشىلىكتىڭ كوزايىمىنا اينالدى. ونىڭ ايتۋىنشا، بۇل ءىس جۇيكەنى تىنىشتاندىرىپ، ءوزىن جەڭىل سەزىنۋگە كومەكتەسەدى ەكەن. سونىڭ ارقاسىندا وليمپيادا كەزىندە وزىنە جەمپىر توقىپ العان.
ءبىر سايىس - ەكى چەمپيون. توكيودا ەرلەر اراسىندا بيىككە سەكىرۋدەن كاتارلىق مۋتاز ەسسە باشريم مەن يتاليالىق دجانموركو تامبەري التىن جۇلدەنى تەڭ ءبولىستى. ەكى سپورتشى دا 2 مەتر 37 سانتيمەتردى باعىندىردى. وسىعان بايلانىستى تورەشىلەر قوس سپورتشىنى دا چەمپيون دەپ تانىدى. ۇزدىك ۇشتىكتى بەلارۋس وكىلى تۇيىندەدى. جالپى، ءبىر التىندى ەكى سپورتشى ءبولىسۋى ءجيى بولا بەرمەيدى. مۇنداي جاعداي جەڭىل اتلەتيكادا 1912 -جىلعى وليمپيادادا بولدى.
ەندى قازاقستان قۇراماسىنا توقتالساق. بيىلعى وليمپيادا ويىندارىندا ءبىزدىڭ كوماندا جارىسقا قاتىسۋشىلار سانى جاعىنان انتيرەكورد جاسادى. 97 سپورتشى. بۇل قازاقستاننىڭ وليمپياداداعى ەڭ تومەن كورسەتكىشى سانالادى. 1996 -جىلعى اتلانتا وليمپياداسىنا 98 سپورتشى بارعان بولاتىن. ال قالعان كەزدە ليتسەنزيا سانى جۇزدەن اسىپ وتىردى.
