قاراعاندى وبلىسىنىڭ باسقارما باسشىسى كارانتيندە توي جاساعانى ءۇشىن قىزمەتىنەن بوساتىلدى

قاراعاندى. قازاقپارات - قاراعاندى وبلىسىندا كارانتين كەزىندە توي جاساعان شەنەۋنىك جۇمىستان بوساتىلدى.

بۇل تۋرالى ءوڭىر باسشىسى جەڭىس قاسىمبەك ونلاين رەجيمىندە وتكەن اپپاراتتىق كەڭەستە ايتتى، دەپ حابارلايدى قازاقپارات ءتىلشىسى.

«بۇگىنگى كۇننەن باستاپ جەر قاتىناستارى باسقارماسىنىڭ باسشىسى قالەل مۇقاتاي ۇلى ماقسۇتوۆ كارانتيندى ورەسكەل بۇزۋ، ياعني پاندەميا كەزىندە توي ۇيىمداستىرۋىنا بايلانىستى قىزمەتىنەن بوساتىلدى. تاعى دا ەسكەرتەمىن، مۇنداي زاڭسىزدىقتار ءۇشىن جازا وتە قاتال بولادى. مۇندا مەملەكەتتىك قىزمەتشىنىڭ قىزمەتتىك ەتيكاسىنىڭ بارلىق نورمالارى بۇزىلعان» - دەدى وبلىس اكىمى.

جەڭىس قاسىمبەك سونداي-اق مونيتورينگتىك توپ مۇشەلەرىن پرينتسيپتىلىككە شاقىردى.

«سىزدەر بىرەۋدىڭ مۇددەسى ءۇشىن جۇمىس ىستەۋ ءۇشىن ەمەس، ازاماتتاردىڭ دەنساۋلىعىن قورعاۋ ءۇشىن قۇرىلعان توپسىزدار! وسىنداي ءىس-شارالاردى توقتاتىپ، جاريا ەتىڭىزدەر. سىزدەر وزدەرىڭىز باقىلاۋ كامەرالارىنا قاراي وتىرىپ جۇمىس ىستەيتىندەرىڭىزدى ايتقان بولاتىنسىزدار. سوندىقتان مۇقيات قاراڭىزدار. سالىنعان تىيىم بارلىعىنا بىردەي»، - دەپ اتاپ ءوتتى وبلىس اكىمى. ەسكە سالساق، وقيعا 7-تامىزدا بولعان. توي بولىپ جاتقان مەيرامحاناعا قاراعاندى قالاسىنىڭ پوليتسيا، سانەپيدباقىلاۋ جانە اكىمدىك قىزمەتكەرلەرىنەن تۇراتىن موبيلدى توپ شىقتى. مەكەمەنىڭ جانىندا كوپتەگەن كولىكتەر بولعاندىقتان جانە مەيرامحانانىڭ وزىندە 500 گە جۋىق ادام بولعاندىقتان، اۋماقتى قورشاۋ ءۇشىن پوليتسيانىڭ قوسىمشا ناريادى شاقىرىلدى.

سونداي-اق، 500 ادام جيناپ توي وتكىزگەن شەنەۋنىك قىزمەتىنەن بوساتىلۋى مۇمكىن ەكەنى تۋرالى دا ايتىلدى.

ايتا كەتەيىك، قاراعاندى وبلىسى «قارا-قىزىل» ايماقتا ورنالاسقان. وڭىردە كۇن سايىن Covid-19 جۇقتىرۋدىڭ مىڭعا جۋىق جاڭا جاعدايى تىركەلەدى. وبلىستىڭ باس سانيتارلىق دارىگەرىنىڭ قاۋلىسىمەن شەكتەۋلەر كۇشەيتىلدى.

اۆتور: اگاتا مۋحامەدجانوۆا