09:55, 08 - تامىز 2021 | GMT +5
د د س ۇ كوروناۆيرۋستىڭ جاڭا مۋتاتسياسىنا جۇلدىزدار شوعىرىنىڭ اتىن قويماقشى
نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمى SARS- CoV-2 كوروناۆيرۋستىڭ جاڭا نۇسقالارىن بەلگىلەۋ ءۇشىن جۇلدىزدار شوعىرىنىڭ اتتارىن الماقشى، دەپ حابارلايدى قازاقپارات DW-كە سىلتەمە جاساپ.
بۇل تۋرالى حالىقارالىق ۇيىمنىڭ ساراپشىسى ماريا ۆان كەركحوۆە The Telegraph بريتان باسىلىمىنىڭ بەرگەن سۇحباتىندا ءمالىم ەتكەن.
«شاماسى بىزگە گرەك ءالىپبيىنىڭ ارىپتەرى جەتپەيتىن سەكىلدى، كەلەسى اتاۋلار لەگىن قاراستىرىپ جاتىرمىز « ، - دەدى ول. ساراپشىنىڭ ايتۋىنشا، ەجەلگى گرەك قۇدايلارىنىڭ اتىن الۋ ۇسىنىلعان. كەيىن بۇدان باس تارتىلعان. د د س ۇ ۆيرۋستى شىققان جەردىڭ اتىمەن اتاۋدى ديسكريميناتسيا دەپ تانىدى.
مامىر ايىنىڭ سوڭىندا ۆيرۋستىڭ جاڭا مۋتاتسياسىن گرەك ءالىپبيىنىڭ 24 ارپىمەن اتاي باستادى. COVID-19 اۋرۋىن تۋدىراتىن SARS- CoV-2 ۆيرۋسى ىندەت باستالعاننان بەرى الەمدە 202 ميلليون ادامنان تابىلعان. 4 ميلليوننان استام ناۋقاس وسى ينفەكتسيادان ءولدى. شامامەن 182 ميلليونى جازىلىپ كەتتى.
