«جارىستان شەتتەتىلدى». تورەشىلەر قازاقستاندىق بالۋاننىڭ توكيوداعى جەڭىسىن «ۇرلاعان»

توكيو. قازاقپارات - قازاقستان كۇرەس فەدەراتسياسىنىڭ ۆيتسە- پرەزيدەنتى ەرلان قوجاسباي تورەشىلەر قازاقستاندىق بالۋان الىشەر ەرعاليدىڭ 2020 -جىلى توكيو وليمپياداسىنىڭ شيرەك فينالىنداعى جەڭىسىن ۇرلاعانىن ايتتى، - دەپ حابارلايدى Vesti.kz.

«22 جاستاعى جاس بالۋان الىشەر ەرعاليدىڭ وليمپيادا ويىندارىنىڭ شيرەك فينالىنداعى جەڭىسى ۇرلاندى. الدىمەن تورەشىلەر ءتورت ۇپايلىق لاقتىرۋدى ەكى ۇپايعا باعالادى، سوسىن تۇرىك بالۋانى بوزكىلەمنەن شىعىپ كەتكەنى ءۇشىن ءبىر ۇپاي بەرمەدى. ەكى كەزەڭدە دە الىشەر شابۋىلعا شىقتى جانە بەلسەندى بولدى، ءبىراق قارسىلاسقا ەسكەرتۋ بەرىلمەدى، بۇل دا ءبىر ۇپاي. بارلىعى ءتورت ۇپاي. تورەشىلەردىڭ مۇنداي ارەكەتتەرىن قالاي بولدىرماۋ كەرەگىن ويلانامىز»، - دەپ كەلتىردى ەرلان قوجاسبايدىڭ ءسوزىن Kazakhstan__wrestling Instagram-پاراقشاسى.

سونداي-اق، وسى جەكپە-جەكتەگى بوزكىلەم جەتەكشىسى جارىستان شەتتەتىلگەنى حابارلاندى. ال قالعان تورەشىلەر تەك ەسكەرتۋ العان.

ەسكە سالايىق، ەرعالي توكيو وليمپياداسىنىڭ شيرەك فينالىندا سۋلەيمان كارادەنيزدەن 7:8 ەسەبىمەن جەڭىلگەن بولاتىن.