قازاقستاندىق كاراتەشى جارتىلاي فينالعا شىقتى، قورجىنعا سەگىزىنشى مەدال تۇسەدى

توكيو. قازاقپارات - قازاقستاندىق كاراتەشى سوفيا بەرۋلسەۆا توكيو وليمپياداسىندا 61 كەلىگە دەيىنگى سالماقتا ءۇشىنشى جەكپە-جەگىن وتكىزدى، - دەپ حابارلايدى قازاقپارات ءتىلشىسى.

بەرۋلسەۆا العاشقى كەزدەسۋىندە تۇركيالىق مەلتەم حودجاوگلۋمەن تەڭ ءتۇسىپ، ەكىنشى جەكپە- جەگىندە يتاليالىق سيلۆيا سەمەرارودان باسىم تۇسكەن.

ال ءۇشىنشى قارسىلاسى ازەربايجاندىق يرينا زارەتسكايا بولدى. قازاقستاندىق كاراتەشى ونى 5:4 ەسەبىمەن جەڭىپ، جارتىلاي فينالعا جولداما الدى.

دەمەك، قازاقستان قورجىنىنا سەگىزىنشى مەدال تۇسەدى.

ايتا كەتەيىك، توكيو وليمپياداسىندا قازاقستان قۇراماسىنىڭ قورجىنىندا جەتى مەدال بار. دزيۋدوشى ەلدوس سمەتوۆ، اۋىراتلەتتەر يگور سون مەن ءزۇلفيا چينشانلو قولا مەدال يەلەنگەن بولاتىن. كەيىن بوكسشىلار قامشىبەك قوڭقابايەۆ پەن ساكەن بيبوسىنوۆ، بالۋان نۇريسلام سانايەۆ پەن كاراتەشى دارحان اسادىلوۆ تە قولا جۇلدە ەنشىلەگەن.