قازاقستاندا سۋسىمالى جۇك تاسىمالدايتىن كونتەينەرلەر قۇراستىرىلۋى مۇمكىن
بۇل تۋرالى «قازاقستان تەمىر جولى» ۇ ك» ا ق باسقارما ءتوراعاسىنىڭ ورىنباسارى ورالحان قۇلاقوۆ ونلاين بريفينگىدە ايتتى.
«قازىر ەكسپورتتاۋشىلار ءۇشىن ەڭ وزەكتى ماسەلە قىتاي نارىعى بولىپ تۇر. ءبىز ءۇشىن ەكىنشى قيىلىستىڭ اشىلعانى جاقسى بولدى. سۋسىمالى جۇكتىڭ ءبىر بولىگى قازىر «التىنكول» ارقىلى ءوتىپ جاتىر. ءبىزدىڭ ەكسپورتىمىزدىڭ، رەسەيدىڭ ترانزيت ارقىلى وتەتىن ەكسپورتىنىڭ كەپتەلىسىن وسى ستانسا كومەگىمەن سەيىلتۋ قولعا الىندى. بۇل ستانسادا قىتاي ءبىزدىڭ ەكسپورتتى قابىلداۋ قارقىنىن ەكى ەسە ارتتىردى. بۇعان دەيىن بۇكىل تاسىمالدىڭ تەك 1 پايىزى عانا كونتەينەرگە تيەلىپ كەلگەن بولسا، ەندى ونىڭ ۇلەسىن مەيلىنشە ارتتىرۋ كەرەك. ونى بۇگىننەن باستاۋ كەرەك. ويتكەنى بىزدە قىتاي باعىتىنا كەتەتىن جۇكتىڭ 80 پايىزى - سۋسىمالى جۇك. ءدال وسى سۋسىمالى جۇكتى مۋلتيمودەلدى تاسىمالعا كوشىرۋىمىز كەرەك. سول ارقىلى ءبىز جۇكتى تولىق كولەمدە وتكىزە الامىز»، - دەدى ق ت ج وكىلى.
ونىڭ ايتۋىنا قاراعاندا، قازىر ەكىجاقتى كەلىسسوز ارقىلى قابىلدانىپ جاتقان شارالاردىڭ ءبارى شەكاراداعى كەپتەلىستى ۋاقىتشا سەيىلتكەنىمەن، پروبلەمانى تۇبەگەيلى شەشە الماۋى مۇمكىن.
«بۇگىندە امبەباپ دەپ جۇرگەن جارتىلاي اشىق ۆاگوندار قاڭتارىلىپ تۇر. 1-مامىرداعى جاعداي بويىنشا قىتاي باعىتىندا 12480 ۆاگون تۇرعان بولسا، ماۋسىم مەن شىلدە ايلارىندا 10 كۇندىك جاپپاي جۇك ءتۇسىرۋ كونۆەنتسياسىن ۇيىمداستىرعان بولاتىنبىز. سونىڭ كومەگىمەن قويمالار مەن ۆاگوندا تۇرعان جۇك كولەمىن ازايتتىق. ءبىراق تاپسىرىس مەرزىمى بۇزىلعانىن ايتىپ شاعىمدانۋشىلار وتە كوپ. دەمەك بۇل ماسەلەنى تۇبەگەيلى شەشپەيدى. سوندىقتان كونتەينەرمەن جۇك تاسىمالداۋعا ءبارىبىر كوشۋىمىز كەرەك. يندۋستريا جانە ينفراقۇرىلىمدىق دامۋ مينيسترلىگى ول كونتەينەرلەر قازاقستاندا جاسالۋى كەرەك دەگەن تالاپ قويىپ وتىر. كونتەينەردەگى تاسىمالعا قانشالىقتى تەز كوشە الساق، پروبلەما دا سونشالىقتى جىلدام شەشىلەدى»، - دەدى ورالحان قۇلاقوۆ.
