قازنەتتە كليەنت كاسسا قىزمەتكەرىنە كورسەتكەن ادەپسىزدىگى تۇسىرىلگەن ۆيدەو تاراپ جاتىر
كادرلاردان كاسسا الدىندا ءىرى دەنەلى ەر ادام تۇرعانى كورىنەدى. وعان جىگىت پەن قىز قىزمەت كورسەتىپ وتىر. اشۋلانعان كليەنت دورەكى مىنەز كورسەتەدى. الدىمەن ول قىزعا قاراپ، بىردەڭە ايتادى دا، كەيىن ەسەپتەگىش قۇرالدى بار كۇشىمەن قىزدىڭ بەتىنە لاقتىرىپ جىبەردى. ول قىزدىڭ سول جاق قۇلاعىنا ءتيدى. كەيىن ول باسىن ۇستاپ ورنىنان تۇرىپ كەتىپ قالادى.
ۆيدەونى Instagram-داعى كوپ پاراقشا جاريالاندى. قولدانۋشىلار وقيعانىڭ قاي جەردە بولعانىن سۇراستىرا باستادى. كەيبىرەۋلەر بۇل الماتىدا بولعان دەپ بولجاعان. قالالىق پوليتسيا ءبولىمى تەكسەرۋ جۇرگىزىپ، بۇل دەرەكتىڭ الماتىدا، ءتىپتى قازاقستاندا تىركەلمەگەنىن انىقتادى.
«ءبىز دەرەۋ تەكسەرە باستادىق. مەن قىرعىزستاندىق ارىپتەستەرىممەن حابارلاستىم، ولار قازىر وقيعانىڭ ولاردا بولعانىن راستادى. 1992 -جىلى تۋىلعان زاڭبۇزۋشى ۇستالىپ، بىشكەكتىڭ وكتيابر اۋدانىنداعى ىشكى ىستەر بولىمىنە جەتكىزىلدى. ارىپتەستەر ءىستى تەرگەپ جاتىر»، - دەدى الماتى قالاسى پ د باستىعىنىڭ ورىنباسارى رۋستام ابدراحمانوۆ.
24.kg مالىمەتىنشە، وقيعا 2-تامىزدا بىشكەكتەگى ساۋدا جانە ويىن-ساۋىق ورتالىقتارىنىڭ بىرىندە بولعان. بەلگىلى بولعانداي، ماس كليەنت ويىنحانا قىزمەتكەرلەرىنىڭ بىرىنە تيىسكەن.
«كليەنتتەرىمىزدىڭ ءبىرى ماس بولعان. ول سورەگە جاقىنداپ، كاسسير قىزعا جۇگىنگەن كەزدە، ول وعان ورىس تىلىندە قىزمەت كورسەتكەن. ول ونىمەن تەك قىرعىز تىلىندە سويلەسۋدى اگرەسسيۆتى تۇردە تالاپ ەتتى. قىز قىرعىز تىلىنە كوشتى، ويتكەنى ول ونى جاقسى بىلەدى. ءبىراق بۇل كەلۋشىگە ۇنامادى. ول وعان ارنارسە لاقتىرىپ، قورقىتا باستادى. ءبىر ساتتە سورەدەن كالكۋلياتوردى ۇستاپ الىپ، ونىڭ باسىنا لاقتىردى»، - دەدى ويىنحانا اكىمشىسى تيمۋر ءجۇنىسوۆ.
ونىڭ ايتۋىنشا، شاقىرتۋمەن كەلگەن پوليتسەيلەر ەر ادام مەن جابىرلەنۋشىنى الىپ كەتكەن، ول ارىز جازعان. ەر ادامدى ناركولوگيا ساراپتاماسىنا اپارۋ كەرەك بولعان. الايدا كوپ ۇزاماي پوليتسيا ماس ەر ادامدى بوساتتى.
«جارتى ساعاتتان كەيىن ول ويىن-ساۋىق ورتالىعىنا ورالىپ، قىزمەتكەرلەرىمىزدى قورقىتىپ، قورلاۋىن جالعاستىردى. ول ەشكىمنەن قورىقپايتىنىن جانە ونىڭ مىنەز-قۇلقى ءۇشىن ەشتەڭە ىستەي المايتىنىن ايتتى»، - دەدى سۇحبات بەرۋشى.
ويىنحانانىڭ اكىمشىلىگى پوليتسيانىڭ «بولعان جاعدايعا ەشقانداي قىزىعۋشىلىق تانىتپاي وتىرعانىن» اتاپ ءوتتى. ولار ءوز قىزمەتكەرلەرىنە دورەكىلىك جاساعان ادام شىنىمەن جازاسىز قالۋى مۇمكىن دەپ قورقادى.
tengrinews.kz
