كوروناۆيرۋستىڭ «دەلتا» شتامىنىڭ قاۋىپتىلىگى قانداي

وسكەمەن. قازاقپارات - شىعىس قازاقستان وبلىسى دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ كوروناۆيرۋستىڭ «دەلتا» شتامىنىڭ قاۋىپتىلىگى قانداي ەكەندىگىن ايتىپ بەردى، دەپ حابارلايدى قازاقپارات ءتىلشىسى.

«وڭىردە Covid-19 ينفەكسياسىن جۇقتىرعاندار سانى ءوسىپ كەلەدى. بۇل بۇكىل قازاقستان اۋماعىندا «دەلتا» شتاممىنىڭ تارالۋىنا بايلانىستى بولىپ وتىر. ءۇندى شتامى وتە قاۋىپتى. ول اگرەسسيۆتى ارەكەت ەتىپ، ناۋقاستار كوبىنەسە ورتاشا اۋىر جانە اۋىر حالگە تۇسەدى»، - دەدى ەرمەك وماربەكوۆ.

ونىڭ ايتۋىنشا، كوروناۆيرۋستىڭ بۇل ءتۇرىنىڭ تارالۋ جىلدامدىعى جوعارى جانە وكپە جاسۋشالارىنا بىردەن اسەر ەتەدى.

«مەديتسينالىق مەكەمەلەرگە اۋرۋدىڭ اۋىرلىعى ورتاشا دارەجەدەگى ناۋقاستار كەلىپ تۇسكەندە ءبىز ولاردى تەكسەرەمىز. بايقاۋىمىزشا، بىرنەشە كۇن وتكەن سوڭ وكپەنىڭ زاقىمدانۋى 70-90 پايىزعا دەيىن جەتەدى. سوندىقتان «دەلتا» شتامىنىڭ الدەقايدا قاۋىپتى ەكەندىگىن قاپەردە ۇستاۋىمىز كەرەك»، - دەدى وبلىستىق دەنساۋلىق ساقتاۋ باسقارماسىنىڭ باسشىسى.

اۆتور: تالعاتجان مۇحامەتبەك ۇلى