ەرمەك وماربەكوۆ: كوروناۆيرۋسقا سەنبەيتىندەردى رەانيماتسيا بولىمشەلەرىنە شاقىرامىن

وسكەمەن. قازاقپارات - شىعىس قازاقستان وبلىسى دەنساۋلىق ساقتاۋ باسقارماسىنىڭ باسشىسى ەرمەك وماربەكوۆ ۆاكسينا العانداردىڭ ۆيرۋس جۇقتىرسا دا رەانيماتسياعا مۇلدە تۇسپەيتىندىگىن ايتتى، دەپ حابارلايدى قازاقپارات ءتىلشىسى.

«ىندەتتەن قورعانۋدىڭ جالعىز جولى - ۆاكسينا. بۇعان سەنبەيتىندەردى جۇقپالى اۋرۋحانالار مەن رەانيماتسيا بولىمشەلەرىنە شاقىرامىن. كوزبەن كورگەن سوڭ اركىم ءوزىنىڭ مۇنداي حالگە ءتۇسىپ قينالعانىن قالامايدى. سوندا عانا ۆيرۋستان قورقىپ، ۆاكسينا الۋ كەرەكتىگىن تۇسىنەدى»، - دەدى ەرمەك وماربەكوۆ.

ونىڭ ايتۋىنشا، ۆاكسينا سالدىرعانداردىڭ جالپى سانىنىڭ تەك 1,6 پايىزى عانا كوروناۆيرۋس جۇقتىرعان.

«ولار اۋرۋدى جەڭىل جانە ورتاشا تۇردە وتكەردى. ەشقايسىسى رەانيماتسياعا تۇسكەن جوق. سەبەبى ولاردىڭ يممۋنيتەتى مەن انتيدەنەلەردىڭ ءتيترى جوعارى»، - دەدى ش ق و دەنساۋلىق ساقتاۋ باسقارماسىنىڭ باسشىسى.

بۇگىنگى تاڭدا وڭىردە ۆاكسينانىڭ ءبىرىنشى كومپونەنتىن 440 مىڭعا جۋىق، ال ەكىنشى كومپونەنتىن 335 مىڭنان استام ادام العان. ايماقتا ءالى 80 مىڭ ۆاكسينا دوزاسى بار.