جول قيىلىسىندا بيلەگەندى ۇناتاتىن قىزدى پوليتسيا توقتاتتى - ۆيدەو

نۇر-سۇلتان. قازاقپارات - كەيىنگى ۋاقىتتا ەلوردا تۇرعىندارى كوشەلەر قيىلىسىندا بيلەيتىن قىزدىڭ ارەكەتىنە اڭ-تاڭ.

5-تامىزدا كەشكى ۋاقىتتا ونىڭ كەزەكتى ءبيىن پوليتسيا قىزمەتكەرلەرى توقتاتتى، - دەپ حابارلايدى Tengrinews.kz ءتىلشىسى.

نۇر-سۇلتان قالالىق پ د باسپا ءسوز قىزمەتىنىڭ مالىمەتىنشە، ءبيشى قىزدىڭ ارەكەتىنە تۇرعىنداردىڭ بىرىنەن 102 ارقىلى شاعىم تۇسكەن.

«5-تامىزدا 21.03-تە 102 كانالىنا كەرەي مەن جانىبەك حاندارى مەن ماڭگىلىك ەل كوشەلەرىنىڭ قيىلىسىندا ءۇش ساعاتتان بەرى بيلەپ تۇرعان قىز تۋرالى حابارلاما ءتۇستى. پوليتسيا قىزمەتكەرلەرى قىزدىڭ جەكە باسىن انىقتادى، ونىمەن پروفيلاكتيكالىق اڭگىمە جۇرگىزىلدى»، - دەلىنگەن حابارلامادا.

پوليتسەيلەر جول-كولىك وقيعالارىنىڭ الدىن الۋ ءۇشىن جۇرگىزۋشىلەردىڭ نازارىن بولمەۋ كەرەگىن ەسكەرتتى.

قىزدىڭ كوشەدەگى ءبيىن جەلى قولدانۋشىلارى دا تالقىلاي باستادى. Instagram-داعى qarakz پابليگىنىڭ اۆتورلارى فوللوۆەرلەرىنەن قىزدىڭ ارەكەتىنە باعا بەرۋدى جانە نەگە بيلەپ جۇرگەنىن ءتۇسىندىرۋدى سۇراعان.

ايدا ەسىمدى قىز «ادامداردى قۋانتىپ، كۇلدىرۋ ءۇشىن» بيلەيتىنىن جازىپتى.

ءبىراق پوليتسەيلەردىڭ كەلۋىنە ءبيشى قىز قۋانىشتى بولا قويماعان. ءتارتىپ ساقشىلارىمەن اڭگىمەلەسۋىن ول ستوريسىندە جاريالاعان.

«قيىلىستا بيلەمەۋ كەرەك دەگەن زاڭ بار ما؟ بۇل دەموكراتيالىق قازاقستانداعى زاڭدى ورنىم. تۇسىنىكتى مە؟ ماعان كەلىپ، كەدەرگى بولۋدىڭ قاجەتى جوق»، - دەيدى قىز ۆيدەودا.