سەرىك ساپيەۆ مادەنيەت پەن سپورتتى ءبولۋ ماسەلەسىنە قاتىستى پىكىر ءبىلدىردى

نۇر- سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە وتكەن ونلاين باسپا ءسوز ءماسليحاتىندا تىلشىلەر ەلىمىزدىڭ مادەنيەت جانە سپورت مينيسترلىگىنەن سپورتتى ءبولىپ الاتىن ۋاقىت جەتكەن جوق پا، دەگەن ساۋال قويدى.

ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆتىڭ سوزىنشە، بۇل وتە جان-جاقتى ويلاستىرىلىپ بارىپ شەشىم قابىلداۋدى قاجەت ەتەتىن كۇردەلى ماسەلە.

«قيىن سۇراق. بۇل جەردە مينيسترلىكتىڭ قۇزىرەتىمەن قاتار، قارجى ماسەلەسى دە رەتتەۋدى قاجەت ەتەدى. ارينە، ەگەر باسشىلىق ءبولۋ كەرەك دەپ تاپسا. قازىرگى تاڭدا بارلىق مەملەكەتتىك ورگانداردا قىزمەتكەرلەردى قىسقارتۋ ءجۇرىپ جاتىر، سوندىقتان بۇل ماسەلە تەرەڭ تالداۋدى كەرەك ەتەدى»، - دەپ جاۋاپ بەردى س. ساپيەۆ ءتىلشىنىڭ سۇراعىنا.

سونداي-اق، كوميتەت باسشىسى بۇرىن مادەنيەت پەن سپورتتىڭ بولەك بولعانىن دا العا تارتتى. «بۇرىن سپورت مينيسترلىگى جانە اگەنتتىگى بولعان. دەگەنمەن ۋاقىت وتە كەلە باسشىلىق مادەنيەت پەن سپورتتى بىرىكتىرۋ قاجەت دەپ شەشتى. بىزگە ءقازىر ەكى سالا بولەك بولعان كەزدە جاعداي قانداي بولدى، قازىر قانداي دەگەن ماسەلەنى مۇقيات زەردەلەپ الۋ كەرەك»، - دەيدى ول.

بۇعان دەيىن س. ساپيەۆ وليمپيادا ويىندارىندا ونەر كورسەتكەن بوكسشىلاردى ونەرىنە باعاسىن بەردى. ودان بولەك، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى توكيو وليمپياداسى ويىندارىنان سوڭ سپورتشىلار جانە ولاردى جاتتىقتىرۋشى باپكەرلەردىڭ قاتىسۋىمەن كەڭەيتىلگەن وتىرىس وتەتىنىن ايتتى. وندا جىبەرىلگەن كەمشىلىكتەر تالقىلانباق.