كوروناۆيرۋس قىتايدىڭ باسىم بولىگىنە تاراپ كەتتى
ءبىر جارىم ميلليارد حالقى بار مەملەكەتتە ىندەتكە تويتارىس بەرۋ ءۇشىن ءبىراز شارالار قولعا الىنعان. بۇل قاتاردا جاپپاي تەستىلەۋ، قالالاردا تولىق نەمەسە جارتىلاي لوكداۋن ءتارتىبىن ەنگىزۋ، كولىك قاتىناسىن توقتاتۋ جانە ميگراتسيالىق ەرەجەلەردى كۇشەيتۋ بار. قىتاي ۇكىمەتى كوروناۆيرۋستىڭ تارالۋىنا بايلانىستى سانيتارلىق شارالاردى كۇشەيتىپ جاتىر. ىندەت وشاقتارى سانالاتىن نانكين مەن يانجوۋ قالالارىنا باراتىن اۋە مەن تەمىرجول قاتىناسى توقتاتىلدى. قازىر جاپپاي تەستىلەۋ جۇرگىزىلىپ جاتىر. ۋحان قالاسىندا جۇماعا دەيىن 12 ميلليون ادام تەكسەرىلۋگە ءتيىس. ال 9 ميلليون تۇرعىنى بار نانكيندە پ ت ر- تەستىلەۋدىڭ 4- كەزەڭى اياقتالۋعا جاقىن. بەيجىڭدە ناۋقاس بارعان ساۋدا ورتالىعى جابىلدى. تاعى دا ەكى قالانىڭ تۇرعىندارىنا ۇيلەرىنەن شىقپاۋ ەسكەرتىلدى.
مي فەن، ق ح ر دەنساۋلىق ساقتاۋ ىستەرى جونىندە مەملەكەتتىك كوميتەتتىڭ رەسمي وكىلى:
- قازىرگى كەزدەگى قىتايداعى ەپيداحۋالدىڭ قاۋپى - ىندەت وشاقتارىنىڭ كوپتىگى. بۇگىندە 17 پروۆينتسيادا كوروناۆيرۋس تىركەلدى. بۇكىل ەل اۋماعىندا جوعارى نەمەسە ورتا قاۋىپتى 144 ايماق بار. بۇل ىندەتكە قاتىستى جاعداي تۇراقتالعاننان كەيىنگى ەڭ جوعارى كورسەتكىش.
ىندەتتىڭ قازىرگى ءورشۋى نانكين اۋەجايىمەن بايلانىستى بولىپ شىقتى. بۇل قالادا رەسەيدەن كەلگەن ۇشاقتى تازالاعان اۋەجاي قىزمەتكەرى «دەلتا» شتامىن جۇقتىرعان. ەندى بۇكىل ەل اۋماعىندا حالىقارالىق رەيستەرگە قىزمەت كورسەتەتىن ادامداردى كۇنارا تەكسەرىپ جاتىر. شەكارالىق باقىلاۋ دا كۇشەيتىلدى. دالەلدى نەگىزى جوق ادامدارعا شەتەلگە بارۋعا ۋاقىتشا رۇقسات ەتىلمەيدى.
ليۋ حايتاو، ق ح ر مەملەكەتتىك يمميگراتسيا باسقارماسىنىڭ وكىلى:
- ءبىز ادامداردىڭ قاۋىرت شارۋاسى بولماسا شەكارادان وتكىزبەيمىز. وقۋ نەمەسە جۇمىس بابى بويىنشا شەتەلگە بارۋعا ءتيىس ازاماتتاردان ارىز قابىلداپ، دەر كەزىندە قۇجاتتارىن راسىمدەيمىز. سوسىن پاندەميامەن كۇرەس نەمەسە ءوندىرىستى جانداندىرۋ ءۇشىن وزگە ەلدەرگە باراتىن ادامداردىڭ قۇجاتتارىن راسىمدەۋدى جەدەلدەتەمىز.
مامانداردىڭ پىكىرىنشە، جاپپاي ۆاكسينالاۋ مەن ازاماتتاردىڭ قاتىناۋىن شەكتەۋ - «دەلتا» شتامىمەن كۇرەسۋدىڭ ەڭ ءتيىمدى جولى. ەكپە سالدىرعان ادامداردا اۋرۋ جەڭىل ءوتىپ جاتىر. جالپى قىتايدا قازىرگە دەيىن ىندەتكە قارسى ەكپەنىڭ ءبىر ميلليارد 700 ميلليون دوزاسى ەگىلگەن .
www.24.kz
