جىلاندار، ورمەكشىلەر: تەمىرتاۋ تۇرعىنى ەكزوتيكالىق بيزنەس اشتى - فوتو
سەرگەي مەن ليديا مالياروۆتار قالالىق ساياباقتا قازاقستاننىڭ جانە باسقا دا ەلدەردىڭ جاندىكتەر الەمى ۇسىنىلعان كورمە اشتى، دەپ حابارلايدى قازاقپارات ءتىلشىسى.
بالا كەزىنەن سەرگەي فاۋناعا جاقىن بولعان. ول مەكتەپ جاسىندا جىلاندى قالاي ۇستاپ، ۇيگە اكەلگەنىن ەسىنە الادى. ءبىراق حوببيىمەن بايلانىستى ەمەس ماماندىقتى تاڭداعان. ون بەس جىل مەتاللۋرگيا زاۋىتىندا جۇمىس ىستەگەن. سودان كەيىن ول پاتەرلەردى جوندەۋمەن اينالىستى. حوببيى قالدى. ول ۇيىندە تاراقاندار، ورمەكشىلەر، كەسىرتكەلەر مەن جىلانداردىڭ ۇلكەن كوللەكسياسىن جيناعان. ەكزوتيكالىق بيزنەس- يدەيانى ايەلى ليديا ۇسىندى. ونىڭ كاسىپكەرلىكتە دە تاجىريبەسى جوق.
«مەن استانادان تەمىرتاۋعا كەلدىم. ەلوردادا شاشتاراز بولىپ جۇمىس ىستەدىم. ءۇش جىل بۇرىن مەن سەرگەيمەن تانىستىم جانە بىرگە تۇرۋدى شەشتىك. دوستارىمىزدان «باستاۋ بيزنەس» باعدارلاماسى تۋرالى بىلدىك. كۋرستارعا جازىلىپ، وقۋدان وتتىك. بيزنەس- جوبانى قورعاپ، گرانت الدىق. كۇيەۋىم ونىڭ كوللەكسياسىن اركىم كورە الاتىنداي كورمە اشۋدى ارماندادى. ەندى - بۇل ءبىزدىڭ وتباسىلىق ءىسىمىز»، - دەيدى ليديا مالياروۆا.
ەرەكشە يدەيا، ارينە، كوميسسيانى تاڭعالدىردى. ءبىراق جوبا باعالاندى، ماقۇلداندى. ۇسىنىلعان اقشاعا مالياروۆتار تەرراريۋمدار مەن ۇستەلدەر جاساۋ ءۇشىن ماتەريالدار ساتىپ الدى. ولاردى وزدەرى جيناپ، زالدى بەزەندىردى. جاڭا باستاعان كاسىپكەرلەر ولارعا قولداۋ كورسەتكەنى ءۇشىن ريزاشىلىق بىلدىرۋدە. مادەنيەت ءبولىمى ارقىلى «ۆوستوك» قالالىق ساياباعىنىڭ اۋماعىندا ءۇي-جايلاردى جالعا الۋ تۋرالى كەلىسىمگە قول جەتكىزىلدى. ەكسپوزيتسيادا قازاقستاندا ءومىر سۇرەتىن شاياندار مەن گەككون كەسىرتكەلەرىنىڭ بىرنەشە ءتۇرى بار. دالا اگاماسى ۇسىنىلعان. تەرراريۋمداردىڭ ءبىرىن جىرتقىش قوڭىزداردىڭ ۇلكەن وتباسى الدى. كوللەكسيا يەسىنىڭ ايتۋىنشا، جاسىل باقا ساتبايەۆتان، سۋ جىلانى جەزقازعاننان اكەلىنگەن. قولا قوڭىز تەمىرتاۋ ماڭىندا جينالدى. كەلۋشىلەر سونداي- اق كامۋفلياج شەبەرى - تاياقشا قوڭىزدى كورە الادى.
اۆتوموبيل- تاراقاندار دا بار. بيىل مالياروۆتار قىزىلقۇم شولىنە ەكسپەديتسياعا بارىپ، كوللەكتسياعا بىرنەشە جاڭا ۇلگىلەر جيناپ الىپ كەلدى. جوبانىڭ ىسكە قوسىلعانىنا ءبىر جىل دا تولعان جوق، الايدا ونىڭ نەگىزىن قالاۋشىلار يندۋستريا قۇرۋدى كوزدەپ وتىر.
«ءبىز قازاقستانداعى جاندىكتەر الەمىنىڭ بايلىعىن كورسەتكىمىز كەلەدى. بۇل بالالار ءۇشىن دە، ەرەسەكتەر ءۇشىن دە پايدالى. شەتەلدىك تۋريستەر ءۇشىن دە قىزىقتى بولادى دەپ ويلايمىن. قاراعاندىدا كورمە پاۆيلونىن اشامىز دەپ ۇمىتتەنەمىز. ءبىزدىڭ جوبامىزدىڭ باسقا دا مۇمكىندىكتەرى بار - عىلىممەن ىنتىماقتاستىق. قاراعاندى ۋنيۆەرسيتەتىمەن سەرىكتەستىك ورناتۋعا ۇلكەن ىقىلاس بار. ستۋدەنتتىك تاجىريبە ءۇشىن ءوز بازامىزدى بەرۋگە دايىنبىز. بىرلەسكەن زەرتتەۋ جوبالارىن دامىتۋعا بولار ەدى»، - دەپ جوسپارلارىمەن ءبولىستى سەرگەي مالياروۆ.
