اقتوتى رايىمقۇلوۆا «سلاۆيان بازارى» بايقاۋىنىڭ جەڭىمپازىن قۇتتىقتادى

«ءبىز رۋحيانى جەڭىسىمەن قۇتتىقتاۋ ءۇشىن ونلاين جينالىپ وتىرمىز. جەڭىس قۇتتى بولسىن! راحمەت ساعان. رۋحيا سەن جاس بولساڭ دا وتە تالانتتىسىڭ. سەن ديماشتىڭ جەڭىسىن قايتالادىڭ، ونىڭ ساعان تالىمگەر بولعان ەڭبەگى اقتالدى. ارينە، بۇل ۇلكەن ونەر مەن كاسىبي ساحنانىڭ باستاۋى عانا»، - دەدى ا. رايىمقۇلوۆا ZOOM ارقىلى وتكەن باسپا ءسوز ءماسليحاتىندا.

سونداي-اق، مينيستر جەرلەسىمىزدىڭ ەل ءۇمىت اقتاپ، قازاقستاننىڭ اتىن الەمگە تاعى ءبىر تانىمال ەتكەنىن ايتتى.

«بۇل رۋحيا قاتىسقان ءبىرىنشى بايقاۋ ەمەس. بۇعان دەيىن دە بىرنەشە ونەر بايقاۋلارىنا قاتىسىپ، جەتىستىكتەرگە جەتىپ ءجۇر. رۋحيانىڭ ءومىربايانىنا قاراپ وتىرساق، ول 2010-جىلدان بەرى قاراي ءتۇرلى بايقاۋلاردان جەڭىسپەن ورالىپ كەلەدى. جالپى ونەر سۇيەر قاۋىم قازاقستاندىق قاتىسۋشىلاردى «سلاۆيان بازارى» بايقاۋىندا ۇنەمى اسىعا كۇتىپ، زور قۇرمەتپەن قارسى الادى. ال رۋحيا ساعان ساتتىلىك تىلەيمىز، الداعى ۋاقىتتا باسقا دا الەمدىك ساحنالاردىڭ تورىنەن كورەمىز دەپ سەنەمىن. سەن ەل ءۇمىتىن اقتادىڭ»، - دەدى ول.

بۇعان دەيىن رۋحيا بايدۇكەننىڭ ۆيتەبسكىدە وتكەن «سلاۆيان بازارى» بايقاۋىنىڭ گران-پري جۇلدەسىن جەڭىپ العانىن حابارلاعان بولاتىنبىز. 14 مەملەكەتتەن كەلگەن قاتىسۋشى سلاۆيان ەلىنەن شىققان كومپوزيتوردىڭ تۋىندىسىن سلاۆيان توبىنا جاتاتىن ءتىلدىڭ بىرىندە وركەستردىڭ سۇيەمەلدەۋىمەن ورىندادى.

بايقاۋ ناتيجەسىندە قازاقستاندىق رۋحيا بايدۇكەنوۆا گران-پري يەگەرى اتانىپ، «التىن ليرا» مۇسىنشەسىمەن بىرگە 20 مىڭ ا ق ش دوللارىنا يە بولدى.