اسقار مامين جەم-ءشوپ دايىنداۋ جۇمىستارىن جانداندىرۋدى تاپسىردى

جەم-ءشوپ دايىنداۋ بويىنشا قازىرگى جاعداي مەن قابىلدانىپ جاتقان شارالار تۋرالى اۋىل شارۋاشىلىعى ءمينيسترىنىڭ مىندەتىن اتقارۋشى ەربول قاراشوكەيەۆ، وڭىرلەردەگى احۋال تۋرالى اتىراۋ وبلىسىنىڭ اكىمى ماحامبەت دوسمۇحامبەتوۆ، قىزىلوردا وبلىسىنىڭ اكىمى گۇلشارا ءابدىقالىقوۆا، ماڭعىستاۋ وبلىسىنىڭ اكىمى سەرىكباي ترۇموۆ، شىعىس قازاقستان وبلىسىنىڭ اكىمى دانيال احمەتوۆ، سولتۇستىك قازاقستان وبلىسىنىڭ اكىمى قۇمار اقساقالوۆ، تۇركىستان وبلىسىنىڭ اكىمى ءومىرزاق شوكەيەۆ، باتىس قازاقستان وبلىسىنىڭ اكىمى عالي يسقاليەۆ، شارۋالاردى جانار-جاعارماي ماتەريالدارىمەن قامتاماسىز ەتۋ تۋرالى ەنەرگەتيكا ۆيتسە-ءمينيسترى اسەت ماعاۋوۆ، سۋمەن قامتاماسىز ەتۋ جانە ەرەكشە قورعالاتىن اۋماقتاردا شابىندىقتار ءبولۋ تۋرالى ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرىكقالي برەكەشيەۆ باياندادى.

جەم-ءشوپ دايىنداۋ ماسەلەلەرىن جەدەل شەشۋ جانە وعان تۇراقتى مونيتورينگ جۇرگىزۋ ماقساتىندا اۋىل شارۋاشىلىعى مينيسترلىگىنىڭ جانىنان رەسپۋبليكالىق جەدەل شتاب جۇمىس ىستەيدى.

وڭىرلەردە جەم-ءشوپ دايىنداۋ جوسپارلارى ايقىندالدى. بيىلعى 18- شىلدەدەگى جاعداي بويىنشا 10,6 ميلليون توننا ءشوپ نەمەسە جوسپارلانعان كولەمنىڭ %44- ى دايىندالدى. قوسىمشا 1,6 ميلليون توننا پىشەندەمە، 2,1 ميلليون توننا سۇرلەم، 4,8 ميلليون توننا سابان جانە 6 ميلليون توننا قۇنارلى جەم دايىندالادى.

ءشوپ شابۋدى ۇيىمداستىرۋ ءۇشىن 255,8 مىڭ گ ا الاڭدى قۇرايتىن ورمان القابى اۋماقتارى ۇسىنىلدى. 6,5 مىڭ شابىندىق بريگاداسى ۇيىمداستىرىلدى، اكىمدىكتەر 41,4 مىڭ توننا جانار-جاعارماي ماتەريالدارىن جەڭىلدىكتى باعامەن قايتا ءبولدى.

«ازىق-تۇلىك كەلىسىمشارت كورپوراتسياسى» ۇ ك» ا ق 170 مىڭ توننا كولەمىندە 4-5 ساناتتى ارپا مەن ءبيداي ساتىپ الۋدى قارجىلاندىردى، قوسىمشا 30 مىڭ توننا كومپانيانىڭ ىشكى رەزەرۆتەرى ەسەبىنەن قايتا بولىنەتىن بولادى.

«مەملەكەت باسشىسى قاسىم- جومارت كەمەل ۇلى توقايەۆ قازىرگى قۇرعاقشىلىق كەزەڭىندە فەرمەرلەردى جەم-شوپپەن قامتاماسىز ەتۋ جونىندە جەدەل شەشىمدەر قابىلداۋ جانە جۇيەلى جۇمىس جۇرگىزۋ بويىنشا مىندەت قويدى»، — دەدى ا. مامين.

پرەمەر-مينيستر جەم-ءشوپ دايىنداۋ جۇمىستارىن جانداندىرۋ، شابىندىقتار بەرۋ ماسەلەلەرىندە ءوڭىرارالىق ءوزارا ءىس-قيمىلدى نىعايتۋ، قۇرعاقشىلىقتان زارداپ شەككەن وڭىرلەردىڭ قاجەتتىلىگ ءۇشىن جەم-ءشوپ قورىن قالىپتاستىرۋ قاجەتتىگىن اتاپ ءوتتى.

ا. مامين حالىققا جەم-ءشوپتى قولجەتىمدى باعامەن ساتۋ ماسەلەسىن ەرەكشە باقىلاۋعا الۋدى تاپسىردى. وسى ماقساتتا اۋىل شارۋاشىلىعى وندىرۋشىلەرىمەن، ۇن تارتۋ كاسىپورىندارىمەن جانە قۇراما جەم زاۋىتتارىمەن مەموراندۋمدار جاساسۋ قاجەتتىلىگى اتاپ ءوتىلدى. جامبىل وبلىسىنىڭ حالىققا قولجەتىمدى باعامەن ءشوپ پەن جەمدى ساتۋ ءۇشىن ارنايى جارمەڭكەلەر ۇيىمداستىرۋ تاجىريبەسى وڭ باعالاندى. سولتۇستىك وڭىرلەردىڭ اكىمدىكتەرىنە ساباندى بارىنشا كوپ جيناۋدى قامتاماسىز ەتۋ تاپسىرىلدى.

پرەمەر- مينيستر 200 مىڭ توننا كولەمىندە مال ازىعى داقىلدارىن فورۆاردتىق ساتىپ الۋعا «ازىق-تۇلىك كورپوراتسياسى» ۇ ك» ا ق ءۇشىن ۇكىمەت رەزەرۆىنەن قاراجات ءبولۋ ماسەلەسىن قاراۋدى تاپسىردى. ەكولوگيا، گەولوگيا جانە تابيعي رەسۋرستار مينيسترلىگىنە ەرەكشە قورعالاتىن تابيعي اۋماقتاردا ءشوپ شابۋ مۇمكىندىگىن قامتاماسىز ەتۋ، ەنەرگەتيكا مينيسترلىگىنە اۋىل شارۋاشىلىعى مينيسترلىگىمەن بىرلەسىپ ءشوپ شابۋ ناۋقانىنا ارزانداتىلعان جانار-جاعارمايدى قوسىمشا ءبولۋ تاپسىرىلدى.

«قازاقستان تەمىر جولى» ۇ ك» ا ق- عا ماڭعىستاۋ جانە قىزىلوردا وبلىستارىنا جەم-ءشوپ تاسىمالداۋعا تومەندەتىلگەن ءتاريفتى قامتاماسىز ەتۋ تاپسىرىلدى.