جالعان ۆاكسيناتسيا پاسپورتىن پايدالانعاندار قانداي جازاعا تارتىلادى

ىشكى ىستەر مينيسترلىگىنىڭ باسپا ءسوز وكىلى شۇعىلا تۇرلىبەك ۆەدومستۆونىڭ اقپارات الاڭىندا وسىنداي مالىمەت بەردى.

«جالعان پ ت ر- تەستەر مەن ۆاكسيناتسيا پاسپورتتارىن قولدان جاساۋشىلاردى، پايدالانۋشىلاردى انىقتاۋ باعىتىنداعى جۇمىستار بەلسەندى ءجۇرىپ جاتىر. تەرگەۋ بولىمشەلەرىنىڭ وندىرىسىندە پ ت ر- تەستەردى قولدان جاساۋ، دايىنداۋ نەمەسە وتكىزۋ بويىنشا قىلمىستىق كودەكستىڭ 385-بابىمەن 42 قىلمىستىق ءىس قوزعالدى. ونىڭ ىشىندە 39 ى بيىل تىركەلگەن. ۆاكسيناتسيا پاسپورتتارىن قولدان جاساۋ بويىنشا جىل باسىنان بەرى 23 قىلمىستىق ءىس تىركەلدى، تەرگەۋ جالعاسۋدا. قولدان جاسالعان قۇجاتتاردىڭ سانى جانە ءاربىر ءىس بويىنشا زاڭعا قايشى ارەكەت ەتكەندەردىڭ سانى دا ءار ءتۇرلى. ولار تەرگەۋ قورىتىندىسى بويىنشا ناقتىلانادى»، - دەدى مينيسترلىك وكىلى.

ونىڭ ايتۋىنشا، ىشكى ىستەر ورگاندار ۆاكسيناتسيا پاسپورتتارى مەن پ ت ر- تەستىڭ جالعان انىقتامالارىن ساتۋ فاكتىلەرىن انىقتاۋ ءۇشىن ءتۇرلى جەدەل ىزدەستىرۋ ءىس- شارالارىن ءالى جالعاستىرا بەرەدى.

«پوليتسيا قىزمەتكەرلەرى مەديتسينالىق ورتالىقتاردى، ەمحانالاردى، ۆاكسينا الۋ پۋنكتەرىن تەكسەرۋدى جالعاستىرۋدا. ىشكى ىستەر مينيسترلىگى جالعان قۇجات جاساعانى ءۇشىن 4 جىلعا دەيىن باس بوستاندىعىنان ايىرۋ تۇرىندەگى قىلمىستىق جاۋاپكەرشىلىك، ال ونى پايدالانعانى ءۇشىن 40 تاۋلىككە دەيىن قاماۋعا الۋ كوزدەلگەنىن ەسكە سالادى»، - دەدى شۇعىل تۇرلىبەك.