رەسەيلىك ۆيرۋسولوگ ءۇندى شتامىن جۇقتىرعاندار اراسىنداعى جاڭا سيمپتوم تۋرالى ايتتى

ناۋقاستاردا كوبىنە اسقازان- ىشەك اۋرۋلارىنىڭ بەلگىلەرى انىقتالعان. بۇل تۋرالى رەسەيلىك ۆيرۋسولوگ، نوۆوءسىبىر مەملەكەتتىك ۋنيۆەرسيتەتىنىڭ (ن م ۋ) بيوتەحنولوگيا، ميكروبيولوگيا جانە ۆيرۋسولوگيا زەرتحاناسىنىڭ مەڭگەرۋشىسى سەرگەي نەتەسوۆ ايتتى، دەپ حابارلايدى قازاقپارات تاسس اگەنتتىگىنە سىلتەمە جاساپ.

«ءبىر سيمپتومداردىڭ ۇلەسى كوتەرىلىپ، باسقا سيمپتومداردىڭ ۇلەسى ازايۋدا. دەلتا نۇسقاسىن جۇقتىرعان ناۋقاستار اراسىندا ءيىس جانە ءدام سەزۋ قابىلەتىنىڭ بۇزىلۋى از بايقالادى، الايدا اسقازان-ىشەك اۋرۋلارىنىڭ بەلگىلەرى كوبىرەك كەزدەسە باستادى»، - دەدى ۆيرۋسولوگ شتامنىڭ جاڭا سيمپتومدارى تۋرالى قويىلعان سۇراققا جاۋاپ رەتىندە.

نەتەسوۆتىڭ ايتۋىنشا، بۇل S اقۋىزىنىڭ رەتسەپتورلىق بايلانىستىرۋشى دومەنىنىڭ قۇرىلىمىنىڭ وزگەرۋىنەن بولىپ وتىر. سوعان سايكەس، ونىڭ جاسۋشالارعا اسەر ەتۋ ەرەكشەلىگى دە وزگەرىسكە تۇسكەن. «بايقاۋىمىزشا، ولار ءبىر- بىرىمەن تىعىز بايلانىستا. مۇنداي جاسۋشالار وكپەدە دە، قان تامىرلارىنىڭ قابىرعالارىندا دا، ىشەكتە دە كەزدەسەدى. سيمپتومداردىڭ اۋىسۋى وسىعان بايلانىستى بولۋى ابدەن مۇمكىن»، - دەپ قوستى ول.

ۆيرۋسولوگ دەلتا شتامىنىڭ اعزادا تەز كوبەيەتىنى بۇعان دالەل بولا الاتىنىن اتاپ ءوتتى.

«بۇنى كوپ ەلدەردىڭ كوروناۆيرۋس بويىنشا دەرەكتەرى راستاي الادى. سول سەبەپتى دە ۆاكتسينالاۋ قارقىنى جوعارى ەلدەر دە زارداپ شەگۋدە»، - دەپ ءتۇسىندىردى نەتەسوۆ.