مادەنيەت جانە قوعام قايراتكەرلەرى ەلوردالىقتاردى ۆاكسينا الۋعا شاقىردى - ۆيدەو

مادەنيەت قىزمەتكەرلەرى مەن قوعام قايراتكەرلەرى يممۋنداۋدان ءوتتى، دەپ حابارلايدى قازاقپارات قالا اكىمدىگىنىڭ رەسمي سايتىنا سىلتەمە جاساپ.

«تولىق تەكسەرىلدىم جانە ۆاكسينانى ەش قورقىنىشسىز الدىم. قۋانىشىما وراي ءبارى جاقسى، ءوزىمدى ويداعىداي سەزىنەمىن. ءوز دەنساۋلىعىڭىزعا جاۋاپكەرشىلىكپەن قاراپ، ۆاكسينا الۋعا شاقىرامىن»، - دەدى نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ كلاسسيكالىق جانە ەسترادالىق ۆوكال ءبولىمىنىڭ كوركەمدىك جەتەكشىسى ارايلىم راحىم.

ايتا كەتۋ كەرەك، ۆاكسيناتسيا - ۇجىمدىق يممۋنيتەتتى دامىتۋدىڭ جانە كوروناۆيرۋستىڭ ەلدە تارالۋىن توقتاتۋدىڭ جالعىز ءتاسىلى.

«مەن ەلوردا تۇرعىنىمىن. عىلىم سالاسىندا جۇمىس ىستەيمىن. سونداي- اق، كوپبالالى وتباسىمىن. بالالارىم مەن جاقىندارىم جانە ءوزىم ءۇشىن ەكپە الدىم. ەلوردا تۇرعىندارى مەن قوناقتارىن، جالپى حالقىمىزدى ۆاكسينا الۋعا شاقىرامىن. تۇمشالانىپ جۇرەتىن ماسكانى شەشەتىن ۋاقىت كەلدى»، - دەدى «قاسيەتتى قازاقستان» ع ز و جەتەكشىسى باتىرحان جۇمابايەۆ.

«ۆاكسينانى ءساۋىر ايىندا الدىم. ءبارى جاقسى ءوتتى، ەشقانداي اۋىرسىنۋ بولعان جوق. تۋىستارىڭىزدى، بالالارىڭىزدى، اتا- انالارىڭىزدى، اتا- اجەلەرىڭىزدى جانە جاقىن دوستارىڭىزدى قورعاۋ ءۇشىن COVID-19 ۆاكسيناسىن قابىلداۋعا شاقىرامىن. امان بولىڭىزدار!» - دەدى ەلوردالىق سيركتىڭ مانەج ينسپەكتورى جولداسبەك يماشەۆ.

ايتا كەتەيىك، دەنساۋلىق ساقتاۋ باسقارماسىنىڭ مالىمەتىنشە نۇر-سۇلتاندا ۆاكسينانىڭ ءبىرىنشى كومپونەنتىن 308 مىڭنان استام ادام الدى. 187 مىڭعا جۋىق قالا تۇرعىنى تولىق يممۋنداۋدان ءوتتى. ەستەرىڭىزگە سالا كەتەيىك، بۇعان دەيىن نۇر-سۇلتان قالاسىنىڭ اكىمى التاي كولگىنوۆ پەن قالانىڭ باس سانيتار دارىگەرى ەلوردالىقتاردى COVID-19-عا قارسى ۆاكسيناتسيادان وتۋگە شاقىرعان بولاتىن.