ايجان ەسماعامبەتوۆا ۆاكسينا الىپ كەيىن كوروناۆيرۋس جۇقتىرعاندار تۋرالى ايتتى

«بارلىعى 4,8 ميلليون ۆاكسينا سالدىرعان ادامداردىڭ %0,06 كوروناۆيرۋس جۇقتىرعان. ناقتى ساندارمەن ايتساق، ىستەردىڭ جالپى سانى - 3165 ناۋقاس تىركەلگەن. ونىڭ ىشىندە ءبىرىنشى كومپونەنتتەن كەيىن - 1684، ەكىنشى كومپونەنتتەن كەيىن - 1481 ادام اۋىرعان. ۆاكسينالار بويىنشا، «سپۋتنيك V» ۆاكتسيناسىنان كەيىن - 2791، Hayat Vax - 293، CoronaVac - 18، QazVac - 59 ادام اۋىرعان. مۇنداي از كورسەتكىشتىڭ بولۋى دا ۆاكسينانىڭ تيىمدىلىگىن كورسەتەدى»، - دەدى ا. ەسماعامبەتوۆا ورتالىق كوممۋنيكاتسيالار قىزمەتىندە وتكەن بريفينگتە.

سونىمەن بىرگە، سپيكەر پاۆلودار وبلىسىندا كوروناۆيرۋستان قايتىس بولعان ايەلدىڭ ءولىمى ۆاكتسينامەن بايلانىستى ەمەستىگىن ايتتى.

«شىنىندا دا مۇنداي جاعداي بار، ءبىراق بۇل جاعداي ۆاكسينالاۋمەن بايلانىستى ەمەس. ول ماۋسىم ايىنىڭ سوڭىندا ءبىرىنشى كومپونەنتتى سالدىرعان، وكىنىشكە وراي، ۆاكتسينا العان سوڭ ەكى اپتادان كەيىن كوز جۇمدى. پاتولوگيالىق-اناتوميالىق اشۋ ناتيجەلەرى بويىنشا، وعان كارديوميوپاتيا دياگنوزى قويىلعان. دەمەك، بۇل ۆاكسينالاۋمەن بايلانىستى ەمەس، اسىرەسە وسىنشا ۋاقىتتان كەيىن ۆاكسينالاۋ اسەرى بولمايدى»، - دەپ ءتۇسىندىردى ا. ەسماعامبەتوۆا.