قازاقستان ۆاكسينا ءوندىرۋشى بىرنەشە كومپانيامەن كەلىسسوزدەر جۇرگىزىپ جاتىر

بۇل تۋرالى ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ءمالىم ەتتى، دەپ حابارلايدى قازاقپارات ءتىلشىسى.

«كەشە ەلىمىزگە Pfizer ۆاكتسيناسىن جەتكىزۋ تۋرالى الدىن الا كەلىسىمنىڭ جۇرگىزىلگەنى بەلگىلى. كەلىسسوزدەر ناۋرىز ايىنان باستاپ جۇرگىزىلىپ كەلەدى. ۆاكسينا جەتكىزۋگە قاتىستى ءبىزدىڭ تاراپىمىزعا بىرنەشە قاتاڭ تالاپتار بولدى، وسى ورايدا ونى جەتكىزۋ ماسەلەسى قوسىمشا ۋاقىتتى تالاپ ەتتى. كەلىسىمشارتقا سايكەس، Pfizer ۆاكسيناسىن جەتكىزۋ ۋاقىتى ازىرگە قىزمەتتىك قۇپيا بولىپ تابىلادى. بەلگىلىسى بيىلعى جىلدىڭ ءتورتىنشى توقسانى دەپ ايتقىم كەلەدى. قازاقستانعا ۆاكسينانى جەتكىزۋ تۋرالى بارلىق كومپانيالارمەن كەلىسسوزدەر ءجۇرىپ جاتىر. ونىڭ ىشىندە Sinofarm، Moderna ۆاكسيناسىن وندىرەتىن قىتايلىق كومپانيالارمەن كەلىسسوز جۇرگىزىلىپ، ولاردىڭ تالاپتارى انىقتالۋدا. ياعني كەلىسسوزدەر بارلىق ۆاكسينا وندىرۋشىلەرمەن جۇرگىزىلىپ جاتىر»، - دەدى ايجان ەسماعامبەتوۆا و ك ق- دە وتكەن باسپا ءسوز ءماسليحاتىندا.

ايتا كەتسەك، كەشە قازاقستاندا رەسەيلىك «سپۋتنيك لايت» ۆاكسيناسى تىركەلدى.

بۇل تۋرالى ق ر د س م مەديتسينالىق جانە فارماتسيەۆتيكالىق باقىلاۋ كوميتەتى حابارلاعان بولاتىن.

«قازىرگى ۋاقىتتا قازاقستاندا بالالاردىڭ دا ۆاكسينا الۋ مۇمكىندىگىن قاراستىرىپ جاتىرمىز. سەبەبى ەلىمىزدە 12-18 جاستاعى 2 ميلليونعا جۋىق جاس ءوسپىرىم بار، بۇل ۇلكەن كورسەتكىش. ونىڭ ۇستىنە بالالاردىڭ اراسىندا دا اتالعان ىندەتكە شالدىعىپ جاتقاندار جوق ەمەس. ياعني ءبىزدىڭ الدىمىزدا تەك ەرەسەكتەردى ەمەس بالالاردىڭ دا دەنساۋلىعىن ساقتاپ، قورعاۋ ماسەلەسى تۇر. ارينە بالالارعا ۆاكسينا سالۋ تەك قانا اتا-اناسىنىڭ نەمەسە اسىراۋشىنىڭ رۇقساتىمەن عانا جۇرگىزىلەدى»، - دەيدى ول.

بۇعان دەيىن ا. ەسماعامبەتوۆا قىزمەتكەر ۆاكسينادان باس تارتقان جاعدايدا جۇمىس بەرۋشى ونى جۇمىستان بوساتا الا ما دەگەن سۇراققا جاۋاپ بەردى.