جاپپاي ۆاكسيناتسيا باستالعاندا ەمحاناعا الدىمەن زەينەتكەرلەر كەلدى - يممۋنولوگ

ال جاپپاي ۆاكسيناتسيا باستالعان كەزدە الدىمەن زەينەتكەرلەر يممۋنداۋعا قاتىسقان، دەپ حابارلايدى قازاقپارات ءتىلشىسى.

№2-اقتوبە قالالىق ەمحاناسى بويىنشا 11 مىڭنان استام ادام ۆاكسينانىڭ ءبىرىنشى كومپونەنتىن قابىلدادى. ال 5 مىڭعا جۋىعى ەكى دوزاسىن دا سالدىردى. يممۋنولوگ دارىگەر ليايليا نۇرجانوۆا قازىرگى جۇمىسى مەن ادامدارعا ءتۇسىندىرۋ شاراسىنىڭ ماڭىزى تۋرالى ايتىپ بەردى.

«جالپى، دارىگەر مەن قۇقىق قورعاۋ ورگاندارىنىڭ قىزمەتكەرلەرى اقپان ايىنان باستاپ ۆاكسينا سالدىردى. اقتوبەگە جەتكىزىلگەن ءتورت ءتۇرلى ۆاكسينا دا ەمحاناعا بەرىلدى. قازىرگى كەزدە تەك سپۋتنيك V ۆاكسيناسىن بەرىپ جاتىرمىز. ادام كوپ. كۇنىنە شامامەن 250-300 ادام كەلەدى. جۇمىس 9:00-دەن 20:00-گە دەيىن جالعاسادى. سەنبى، جەكسەنبى كۇندەرى دە جۇمىس توقتامايدى. شىن مانىندە كەشكىلىك جۇمىستان شىعىپ كەلەتىندەر بار. ءارى كوپ ۇجىمعا يممۋنداۋ جۇمىسىنا قاتىسۋ مىندەتتەلدى»، - دەدى №2-اقتوبە قالالىق ەمحاناسىنىڭ يممۋنولوگ دارىگەرى ليايليا نۇرجانوۆا.

تالاپ بويىنشا ەكپە سالدىرماس بۇرىن دارىگەرلەر تەكسەرەدى. جۇكتى ايەل، ونكولوگيالىق اۋرۋعا شالدىققاندار مەن حيمياتەراپيا الىپ جۇرگەندەر ۆاكسينا سالدىرمايدى.

«سوزىلمالى دەرتكە شالدىققاندار قازىر ءوزىن جاقسى سەزىنسە، ۆاكسينا سالدىرا بەرەدى. تۋا ءبىتتى سال اۋرۋىمەن اۋىراتىندار، ينسۋلت العاندار دا يممۋنداۋ جۇمىسىنا قاتىسا الادى. ءسويتىپ ءار ادامنىڭ دەنساۋلىعىنا، جاعدايىنا جەكە قاراپ، شەشىم شىعارامىز. ادامدار ءۇشىن ەمحانادا بارلىق جاعداي جاسالعان. ءبىرىنشى جانە ەكىنشى كومپونەنتتى ەكى بولەك كابينەتتە قابىلدايدى. ءۇش كۇن بويى دارىگەرلەرىمەن بايلانىسىپ، ءوز جاعدايىن ايتىپ تۇرادى. ورنى سىزداپ، باسى اۋىرعاندار بولدى. ولار تەك 2-3 كۇن ءوزىن جايسىز سەزىندى. وزىمدە دە ۆاكسينا سالدىرعان ورىن اۋىردى. اۋىرىپ، اۋرۋحاناعا تۇسكەندەرى كەزدەسپەدى. جاسى 80 نەن اسقان ادامدار دا كەلىپ، العىسىن ايتىپ كەتىپ جاتىر. شىنىمدى ايتسام، العاش كۇننەن بەرى زەينەتكەرلەر بەلسەندى. سودان كەيىن مەكتەپ، كوللەدج مۇعالىمدەرى، وقىتۋشىلارى كەلدى. ادامنىڭ كەپ كەلۋى ءبىزدى قۋانتادى»، - دەدى ليايليا نۇرجانوۆا.

دەگەنمەن ءار كەلۋشىگە زەيىن سالىپ، ولاردىڭ جۇرەك سوعىسىن، تىنىس الۋىن تىڭداۋ، قىزۋىن ولشەۋ دە ءبىراز ۋاقىتتى تالاپ ەتەدى.

«مەن ۆاكسينا سالدىرمايمىن» دەگەن ادامنىڭ ماماندارمەن كەزدەسۋىنە جاعداي جاسالدى. يممۋنولوگ، ەپيدەميولوگتار جان-جاقتى دالەلدى ءسوز ايتقان سوڭ بىردەن ونىڭ پىكىرى وزگەردى. ءبارى بۇعان دەيىن الەۋمەتتىك جەلىدەن عانا اقپارات العان. ءسويتىپ تەرىس پىكىر قالىپتاستىردى. ال ماماندار دۇرىس جولىن ايتتى»، - دەدى ليايليا نۇرجانوۆا.

اۆتور: التىناي ساعىندىقوۆا