جۇت جاعدايىندا قۇرباندىق شالۋعا تىيىم سالىنا ما - باس ءمۇفتي جاۋابى
نۇر- سۇلتان. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى قۋاڭشىلىق پەن جۇت جاعدايىندا قۇرباندىق شالۋ تۋرالى سۇراقتارعا جاۋاپ بەردى، دەپ حابارلايدى قازاقپارات.
«شوپان اتا» قويشىلار قاۋىمداستىعىنىڭ ءتوراعاسى الماسبەك سادىربايەۆ قۇرباندىق شالماۋدى، مال باسىن ساقتاپ قالۋدى جانە زارداپ شەككەن وڭىرلەرگە كومەكتەسۋدى ۇسىنعان ەدى. بۇعان نە ايتاسىز؟»، - دەگەن سۇراق قويىلدى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
باس ءمۇفتيدىڭ ايتۋىنشا، ءدىني باسقارماعا مۇنداي ۇسىنىستار بىرنەشە ادام تاراپىنان ايتىلعان. «دەگەنمەن، شاريعات ەرەجەلەردەن، تالاپتاردان تۇراتىنى بارشامىزعا بەلگىلى. اللا تاعالا قاسيەتتى قۇراندا كاۋسار سۇرەسىندە «اللا ءۇشىن ناماز وقى جانە قۇرباندىق شال» دەيدى. وسى اياتتاعى بۇيرىق جاعدايى كەلگەن ءاربىر مۇسىلمانعا قۇرباندىق شالۋدى مىندەتتەيدى. جانە پايعامبارىمىز س. ع. س. «جاعدايى كەلە تۇرا قۇرباندىق شالماعان ادامدار ءبىزدىڭ ناماز وقيتىن ورنىمىزعا جاقىنداماسىن» دەيدى. ياعني، بۇل تالاپتار جاعدايى بار ادامدارعا قۇرباندىق شالۋدىڭ مىندەت ەكەنىن كورسەتىپ تۇر»، - دەپ جاۋاپ بەردى ناۋرىزباي قاجى تاعان ۇلى.
سونىمەن بىرگە، باس ءمۇفتي يسلام دىنىندەگى كوپ مەرەكەلەردە حالىققا كومەك كورسەتىلەتىنىن اتاپ ءوتتى.
«قۇرباندىق مالىنىڭ دا ءبىر بولىگى مۇقتاج جاندارعا بەرىلەدى. ءتىپتى تولىقتاي بەرۋگە دە شاريعاتىمىز رۇقسات ەتەدى. ەگەر ءبىر كىسى قۇربان شالسا، سول مالدىڭ ەتىن تولىعىمەن مۇقتاجدارعا بەرىڭىزدەر دەي الادى. ءبىز وسى سالادا كوپ جىل جۇمىس ىستەدىك جانە كورگەن تاجىريبەمىزدە كوپ ادامدار قۇرباندىق ۋاقىتى جاقىنداعاندا مەشىتتەرگە كەلىپ، تىزىمگە تىركەلىپ، كومەك الادى. قارتتار جانە بالالار ۇيلەرى دە وزدەرى حابارلاسىپ، قۇربان ايتتا ءبىر جىلعا جەتەتىن ەت جينايدى. ولاردى توڭازىتقىشتا ساقتاپ، كەلەسى جىلعا دەيىن پايدالانادى. ياعني بۇل جەردە كورەگنىمىز وسى قۇرباندىقتىڭ ءوزى قايىرىمدىلىق رەتىندە ەلىمىزگە ۇلكەن كومەك بولىپ كەلدى»، - دەدى ناۋرىزباي قاجى تاعان ۇلى.
ق م د ب جۇت بولىپ جاتقان جەرلەردە شاما- شارقىنشا كومەك قولىن سوزىپ جاتىر.
«ۇكىمەتتەن دە قاراجات ءبولىنىپ جاتىر جانە بۇل ماسەلە شەشىلەدى دەپ ۇمىتتەنەمىز. سوندىقتان، ۇسىنىس جاساپ جاتقاندارعا راحمەت، شاريعاتتىڭ تالاپ ەتكەن شارتتارىن مۇفتيلەر نەمەسە عالىمدار وزگەرتە المايدى. بىلتىر دا، بيىل دا ىندەت جاعدايىندا قۇرباندىق شالۋعا جانە ۇلەستىرۋگە جەتىلىپ كەلە جاتىرمىز. اللا تاعالا نيەتىمىزدى قابىل ەتسىن»، - دەدى ناۋرىزباي قاجى تاعان ۇلى.
اۆتور: ايجان سەرىكجان قىزى
