ماسكا، پ ت ر-تەست جانە ۆاكسينالاردا ترومبوز تۋدىراتىن زات بار ەكەندىگى راس پا

بۇل جالعان. بۇل تۋرالى قازاقپارات stopfake.kz سايتىنا سىلتەمە جاساپ حابارلايدى.

گرافەن - قالىڭدىعى ءبىر اتوم بولاتىن كومىرتەك اتومدارىنىڭ قاباتىنان تۇراتىن ماتەريال. گرافەن وكسيدى تەرمينى گرافەننىڭ وتتەگى بار فۋنكسيونالدى توپتارمەن جانە (نەمەسە) مولەكۋلالارمەن بايلانىسىن بىلدىرەدى.

قۇرىلىمىندا ءبىر نەمەسە بىرنەشە بور، ازوت، اليۋميني، فوسفور، كرەمني، كۇكىرت نەمەسە ولارعا نەگىزدەلگەن توپ اتومدارى بار گرافەن وكسيدتەرى بەلگىلى. مىسالى، مەلامين، فوسفين، سيلان، پوليسيلوكسان، سۋلفيدتەر جانە ت. ب.. تۇرلەرى - پوليەتيلەنگليكول، پوليەفير، پوليۆينيل، پولياكريل جانە ت. ب. سياقتى پوليمەرلەرمەن وزگەرتىلگەن گرافەن وكسيدتەرى.

گرافەن مەن ونىڭ وكسيدتەرىن قولدانۋ اياسى وتە كەڭ جانە ءالى دە زەرتتەۋ ساتىسىندا.

اتاپ ايتقاندا، گرافەن وكسيدى قاتەرلى ىسىكتەردى ەمدەۋگە ارنالعان ءدارى- دارمەك وندىرىسىندە، عىلىمي تاجىريبەلەردە، د ن ق رەتتىلىگى كەزىندە، ونەركاسىپتە جانە باسقا سالالاردا قولدانىلادى. مەديتسينالىق ماسكالار وندىرىسىندە گرافەندى قولدانۋ زەرتتەلدى.

بۇل زەرتتەۋلەر وڭ ناتيجە كورسەتتى. كەيبىر كومپانيالار گرافەنمەن قاپتالعان جەكە قورعانىس قۇرالدارىن شىعارا باستادى. الايدا، مۇنداي جاڭالىق كەيبىر ازاماتتار اراسىندا الاڭداۋشىلىق تۋدىردى. اتاپ ايتقاندا، كانادادا مۇنداي ماسكالار پارتياسىنا شاعىمدار ءتۇستى: ولاردى كيگەن ادامدار باس اۋرۋى، تاماقتىڭ جىبىرلاۋى جانە السىزدىك سەزىنگەندەرىن ايتقان.

وسىدان كەيىن پارتيا قايتارىلدى. بۇل تۋرالى ءبىز جازعان بولاتىنبىز. كەيىننەن كانادا بيلىگى گرافەنمەن قاپتالعان جەكە قورعانىس قۇرالدارىن زەرتتەپ، ولاردىڭ ۋىتتىلىعىنا دالەلدەر تاپپادى.

ايتا كەتەيىك، زاماناۋي ماتەريالدان جاسالعان جابىن بارلىق مەديتسينالىق ماسكالاردا بولمايدى. ولاردىڭ كوبى سپانبوندتان جاسالادى جانە قۇرامىندا گرافەن نەمەسە ونىڭ وكسيدتەرى جوق. قازاقستاندا گرافەن جابىنى بار ماسكالار جوق. گرافەن وكسيدى پ ت ر تەستىلەۋ ءادىسىن جاقسارتۋ قۇرالى رەتىندە دە قاراستىرىلادى.

الايدا، بۇل جاعدايدا زات بيوماتەريال الۋ كەزىندە ەمەس، تالداۋ كەزىندە تىكەلەي قولدانىلادى. تيىسىنشە، ادام دەنەسىنىڭ شىرىشتى قاباتتارىنان جاعىندى الاتىن ستيكتەردە گرافەن وكسيدى جوق. وسىلايشا، پ ت ر- تالداۋ الۋ كەزىندە گرافەن وكسيدى پاتسيەنتتىڭ دەنەسىمەن ەشقانداي بايلانىستا بولمايدى جانە قانداي دا ءبىر زيان كەلتىرە المايدى.

COVID-19 قارسى ۆاكسينالار قۇرامىنداعى گرافەن وكسيدىنە كەلەتىن بولساق، بۇل قاستاندىق تەورياسى. ۆاكسينالاردا گرافەننىڭ دە، ونىڭ وكسيدتەرىنىڭ دە نەگە بولمايتىنى تۋرالى تولىعىراق مىنا جەردەن وقي الاسىز: گرافەن جانە ونىڭ وكسيدتەرى دەنەگە تەرىس اسەر ەتۋى مۇمكىن. دەگەنمەن، ءدارى- دارمەكتە قولدانىلاتىن وكسيدتەردىڭ تۇرلەرى بارلىق ىقتيمال تەرىس اسەرلەردى بەيتاراپتاندىرۋ ءۇشىن موديفيكاتسيالانادى. گرافەن وكسيدى ترومبوز تۋدىرمايدى.

كەرىسىنشە، بۇل زات وسى اۋرۋدى ەمدەۋگە ارنالعان پرەپاراتتاردى ازىرلەۋ ءۇشىن قولدانىلادى. گرافەن وكسيدىنىڭ پايدالانۋشىلار جازعانداي ميدى قورعايتىن گەماتوەنتسەفاليتيكالىق توقسقاۋىلدان ءوتۋ مۇمكىندىگى ءىس جۇزىندە زەرتتەلمەگەن. عالىمداردا بۇل زات ميمەن ارەكەتتەسىپ، نەيرولوگيالىق اۋرۋلاردى تۋدىرۋى مۇمكىن دەپ ايتۋعا جەتكىلىكتى نەگىز جوق. دەمەك، ماسكالاردا، پ ت ر- تەستتەردە جانە ۆاكسينالار قۇرامىنداعى گرافەن وكسيدىنىڭ بولاتىنى تۋرالى حابارلامالار اسىرا سىلتەۋ، مانيپۋلياتسيا جانە كونسپيرولوگيا. بۇل زاتتى قولدانۋ اياسى وتە كەڭ بولعانىنا قاراماستان، ول مەديتسينالىق ماسكالار ءوندىرىسىنىڭ كوبىندە قولدانىلمايدى.

قازاقستاندا مۇنداي جەكە قورعانۋ قۇرالدارى مۇلدەم جوق. پ ت ر تەستىلەۋ كەزىندە گرافەن وكسيدى قولدانىلۋى مۇمكىن، ءبىراق بيوماتەريالدى الۋ كەزىندە ەمەس، تالداۋ ساتىسىندا عانا. تيىسىنشە، زات ادام دەنەسىمەن ءوزارا ارەكەتتەسپەيدى. COVID-19 قارسى ۆاكسينالار قۇرامىندا بۇل زات جوق. گرافەن وكسيدىنىڭ توكسيكولوگيالىق قاسيەتتەرى ءالى دە زەرتتەلۋدە، ءبىراق عالىمدار ونى ءدارى- دارمەك جاساۋ كەزىندە قولدانۋ ءۇشىن كومپونەنتتىڭ تەرىس اسەرىن بەيتاراپتاندىرۋدىڭ جولىن تاپتى.