بەيجىڭدە نوسەر جاڭبىر قۇيىپ تۇر

قالالىق سۋ تاسقىنىنا قارسى شتابتىڭ حابارلاۋىنشا، جەكسەنبى كۇنگى ساعات 18: 00-دەن بەرى بەيجىڭدە ورتاشا جاۋىن- شاشىن مولشەرى 65,9 م م بولعان. ال قىتاي استاناسىنىڭ قالالىق اۋداندارىندا ورتاشا ەسەپپەن 79,9 م م جەتكەن. بەيجىڭنىڭ 203 مەتەورولوگيالىق ورتالىعىندا 50 م م- دەن استام جاۋىن- شاشىن تىركەلدى، 43 مەتەورولوگيالىق ورتالىقتا ونىڭ مولشەرى 70 م م- دەن اسقان.

سونىمەن قاتار، فانشان، مەنتۋگۋ، چانپين، حايديان، شيجينشان، يانشين جانە حۋايرۋ اۋداندارىندا سوققان جەلدىڭ جىلدامدىعى 24,4 م/س جەتتى. استانالىق سۋ تاسقىنىنا قارسى شتاب قالانىڭ نەگىزگى كوپىرى مەن جول نىساندارىنىڭ قاۋىپسىزدىگىن تەكسەرۋ ءۇشىن 2906 قىزمەتكەر جىبەرىلگەنىن حابارلادى. قازىرگى ۋاقىتتا نوسەر جاڭبىرعا بايلانىستى بەيجىڭگە 57 سورعى ستانسياسى تارتىلدى، ولاردىڭ كومەگىمەن 140 مىڭ تەكشە مەتر سۋ سورىلدى. سينوپتيكتەر دۇيسەنبى كۇنى دە جاڭبىر تولاسسىز جاۋىپ، ول تەك سەيسەنبىگە قاراعان ءتۇنى توقتايدى دەپ بولجاپ وتىر. قالا اكىمشىلىگى جاڭبىر سالدارىنان بولاتىن نايزاعاي، داۋىل جانە گەولوگيالىق قاۋىپتەر تۋرالى ەسكەرتۋ جاسادى.