قازاقستان ورتالىق ازياعا قانداي تاۋارلار ەكسپورتتايدى

نۇر- سۇلتان. قازاقپارات - ساۋدا جانە ينتەگراتسيالار ءمينيسترى باقىت سۇلتانوۆ ورتالىق ازيا ەلدەرىمەن تاۋار اينالىمى تۋرالى ايتىپ بەردى، دەپ حابارلايدى قازاقپارات ءتىلشىسى.

«وتكەن جىلى ورتالىق ازيا ەلدەرىمەن تاۋار اينالىمى شامامەن 4,6 ميلليارد دوللارعا جەتتى. ونىڭ ىشىندەگى ەڭ ءىرى سەرىكتەس - وزبەكستان، وندا ءبىز شامامەن 2,1 ميلليارد دوللارعا بيداي، ۇن، مۇناي جانە مۇناي ونىمدەرىن، مەتالدار مەن مەتالدان جاسالعان بۇيىمدار ەكسپورتتايمىز»، - دەدى ساۋدا ءمينيسترى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا. ءمينيستردىڭ ايتۋىنشا، بۇگىندە كووپەراتسيا اياسىندا ماشينا جاساۋ ونىمدەرىنىڭ پايدا بولۋى دا وتە ماڭىزدى.

«تاجىكستانعا شامامەن 800 ميلليون دوللار بولاتىن بيداي، تابيعي گاز، مۇناي ونىمدەرى، كومىر جىبەرەمىز، قىرعىزستانعا - 562 ميلليون دوللارعا باعالاناتىن شامامەن وسىنداي ءونىم جەتكىزدىك. يمپورتقا كەلسەك، توقىما، قۇرىلىس ماتەريالدارىن جانە ماۋسىمدىق جەمىس- كوكونىس ونىمدەرىن الامىز» - دەدى باقىت سۇلتانوۆ.

ايتا كەتەيىك، ق ر ساۋدا جانە ينتەگراتسيا ءمينيسترى باقىت سۇلتانوۆ حالىق الدىنداعى ەسەپتىك كەزدەسۋىنىڭ قورىتىندىسى بويىنشا ونلاين باسپا ءسوز كونفەرەنسياسىن وتكىزىپ جاتىر.

اۆتور: ايجان سەرىكجان قىزى