گايتي پرەزيدەنتىنىن ولتىرۋگە بىرنەشە كيللەر جالداعان كۇدىكتى ۇستالدى
نۇر-سۇلتان. قازاقپارات - گايتي بيلىگى 63 جاستاعى امەريكالىق كريستيان ەممانيۋەل سانوندى ۇستادى.
ول گايتي پرەزيدەنتى جوۆەنەل مويزدى ءولتىرۋ ماقساتىندا بىرنەشە كيللەر جالداعان دەگەن كۇدىككە ءىلىندى، دەپ حابارلايدى قازاقپارات BBC اگەنتتىگىنە سىلتەمە جاساپ.
«سانون گايتيگە ماۋسىم ايىنىڭ باسىندا ءوزىنىڭ جەكە ۇشاعىمەن ۇشىپ كەلگەن. جانىندا التى كولۋمبيالىق كۇزەتشىسى دە بولعان. ونىڭ ەلگە كەلۋدەگى «ساياسي ماقساتى» - توڭكەرىس جاساپ، پرەزيدەنت بولۋ»، - دەدى گايتي پوليتسياسىنىڭ باستىعى لەون شارل كەيبىر مينيسترلەر قاتىسقان باسپا ءسوز ءماسليحاتىندا.
شارلدىڭ ايتۋىنشا، قاستاندىق جاساۋشىلاردىڭ تاعى ەكى جەتەكشىسى بولعان، الايدا ولاردىڭ اتى اتالمادى. سانوننىڭ ءۇيىن ءتىنتۋ كەزىندە قارۋ-جاراق پەن وق-دارىلەر تابىلدى. سانوننىڭ ءوزى بۇل تۋرالى نە ايتاتىنى ءالى بەلگىسىز.
ەسكە سالساق، گايتي پرەزيدەنتى دجوۆەنەل مويز سەيسەنبىدەن سارسەنبىگە قاراعان ءتۇنى رەزيدەنتسياسىندا بەلگىسىز ادامداردىڭ شابۋىلىنان قازا تاپقان بولاتىن. شابۋىل كەزىندە ەلدىڭ ءبىرىنشى حانىمى مارتين مويز جاراقات الىپ، اۋرۋحاناعا جەتكىزىلدى. سونىمەن قاتار، جوۆەنەل مويزدى ءولتىردى دەگەن كۇدىكپەن قىلمىسكەرلەر ۇستالدى.
