بيىل تۇرعىن ءۇي باعاسى قانشالىقتى قىمباتتادى؟

بۇل سۇراققا ق ر باسەكەلەستىكتى دامىتۋ جانە قورعاۋ اگەنتتىگى ءتوراعاسىنىڭ ورىنباسارى بولات سامبەتوۆ جاۋاپ بەردى، دەپ حابارلايدى قازاقپارات ءتىلشىسى.

«ۇلتتىق ستاتيستيكا بيۋروسىنىڭ مالىمەتىنشە، بيىل ەلىمىزدە قاڭتار-ماۋسىم ايىندا جاڭا سالىنعان تۇرعىن ءۇيدىڭ باعاسى 9 پايىزعا وسكەن. ال قولدانىستاعى تۇرعىن ءۇيدىڭ باعاسى 14 پايىزعا ارتقان. ال وتاندىق قۇرىلىس ماتەريالدارىنىڭ باعاسىنا كەلسەك، بيىل قاڭتار-مامىر ايىندا 19 پايىزعا وسكەنى بايقالدى»، - دەدى ب. سامبەتوۆ و ك ق- دە وتكەن باسپا ءسوز ءماسليحاتىندا.

ونىڭ ايتۋىنشا، وتاندىق جانە شەتەلدىك قۇرىلىس ماتەريالدارى باعاسىمەن قاتار، شيكىزاتتىڭ باعاسى دا وسكەن.

«وسى ورايدا قۇرىلىس ماتەريالدارىن وندىرۋشىلەر تاراپىنان نارىقتا الىپساتارلىق ارەكەتتىڭ ورىن العانى بايقالادى. سول سەكىلدى اگەنتتىك ءادىل باسەكەلەستىكتى قورعاۋ سالاسىندا قۇقىق بۇزۋشىلىقتى انىقتادى جانە ول باعا كەلىسىمىمەن بايلانىستى. ياعني باعانى ءوز بەتىمەن ورناتۋ»، - دەيدى ول.

بۇعان دەيىن ق ر يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنبايەۆ ەلىمىزدە تۇرعىن ءۇي باعاسىنىڭ ءوسۋ سەبەبىن تۇسىندىرگەن بولاتىن.