جالعان ۆاكسينا پاسپورتىن جاساعانداردى پوليتسياعا ءوزىمىز تاپسىردىق - ناريمان تابىنبايەۆ

ونىڭ ايتۋىنشا، الماتى مەديتسينالىق مەكەمەلەرىندە ۆاكسينا قۇجاتتارىن قولدان جاساۋدىڭ ەكى جاعدايى انىقتالىپ، دالەلدەنگەن. ونىڭ ءبىرىنشىسى وسىدان 2,5 اي بۇرىن 21№ ەمحانادا انىقتالسا، ەكىنشىسى 4№ قالالىق ەمحانادا بەلگىلى بولدى.

«بۇل جاعدايلاردى قوعامدىق دەنساۋلىق ساقتاۋ باسقارماسى ءوزى انىقتادى. سونىمەن قاتار، وسىعان قاتىستى جاعدايدى پوليتسيا دەپارتامەنتىنە ءوزىمىز جولدادىق. قازىر تاعى ءبىر ەمدەۋ ورنىن انىقتاۋ بويىنشا پوليتسياعا جۇگىندىك. سونداي-اق مۇنداي جاعداي قايتالانباس ءۇشىن قۇقىق قورعاۋ ورگاندارىمەن بىرگە ۆاكسينا سالىناتىن ورىنداردا ءتۇسىندىرۋ جۇمىستارىن جۇرگىزىپ جاتىرمىز، - دەدى ول.

سونىمەن قاتار، ول جالعان ۆاكسينا پاسپورتىن جاساعان مەديتسينا قىزمەتكەرلەرىنە قانداي جازا قولدانىلاتىنىن ايتتى.

«بۇل ادامدار جالعان قۇجات جاساپ، ۆاكتسينانى جويعان. قازىر ولارمەن پوليتسيا قىزمەتكەرلەرى جۇمىس ىستەپ جاتىر. ال، مەكەمە باسشىلارى جۇمىستارىن جالعاستىرۋدا. تەرگەۋ جۇمىستارى اياقتالعان سوڭ ءبارى بەلگىلى بولادى»، - دەدى باسقارما باسشىسى.

بۇعان دەيىن، قالاداعى «دوستار مەد» جانە «سۇڭقار» قىزمەتكەرلەرى جالعان قۇجاتتار جاساعانى ءۇشىن ۇستالعانى، سونداي-اق 4№ ەمحانادا مەديتسينالىق قىزمەتكەرلەردىڭ ۆاكسيناتسيا پاسپورتتارىن ساتقانى جانە ۆاكسينالاردى زاڭسىز جويعانى تۋرالى حابارلاعان بولاتىنبىز.