پرەزيدەنت مەديتسينالىق مەكەمەلەردىڭ قوندىرعىلارمەن جابدىقتالۋ دەڭگەيىن سىنعا الدى

نۇر- سۇلتان. قازاقپارات - پرەزيدەنت قاسىم- جومارت توقايەۆ مەديتسينالىق قوندىرعىلاردى ساتىپ الۋ جۇيەسىن ورتالىقتاندىرۋ تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«ۆيرۋسپەن كۇرەس اياسىندا دەنساۋلىق كورسەتكىشتەرى كۇرت ءتۇسىپ كەتتى. انالاردىڭ ءولىمى ۇشتەن بىرگە، جۇرەك اۋرۋلارىنان تۋىندايتىن ءولىم- ءجىتىم 40 پايىزعا ءوستى. بۇعان اسىرەسە رەانيماتسيالىق بولىمشەلەرى مەن جەدەل جاردەمنىڭ جابدىقتالۋ دەڭگەيىنىڭ تومەندىگى دە اسەر ەتىپ وتىر. دەنساۋلىق ساقتاۋ ۇيىمدارىن قاجەتتى قوندىرعىلارمەن جابدىقتاۋدى جەدەل ۇيىمداستىرۋعا باسى ارتىق پروتسەدۋرالار ءجيى مۇمكىندىك بەرمەۋدە»، - دەدى مەملەكەت باسشىسى.

سونداي- اق، ول قاجەتتى قۇرالداردىڭ دەر كەزىندە جەتپەي جاتۋىنا جەمقورلىق تاۋەكەلدەردىڭ دە قاتىسى بار ەكەنىن اتادى.

«مەديتسينالىق ونىمدەردىڭ ساراپتاماسى مەن تىركەلۋى جوعارى جەمقورلىق تاۋەكەلدەرمەن بايلانىستى. قوندىرعىلاردىڭ قۇنىن اقىلعا قونىمسىز ءتۇسىرۋ دە جابدىقتاۋ دەڭگەيىنىڭ تومەن بولۋىنا اسەر ەتىپ وتىر. ءبىر بۇيىمنىڭ باعاسى ءوڭىر- وڭىردە، ءتىپتى كەيدە ءبىر وڭىردەگى كلينيكالاردا ءار ءتۇرلى بولىپ جاتادى. مىسالى جۇرەك قالقانشاسىنىڭ جاساندى قۇرىلعىسى 165 مىڭنان 600 مىڭ تەڭگەگە دەيىن قۇبىلادى. كورونارلىق ستەندتەردىڭ باعاسى 150 مىڭنان 500 مىڭ تەڭگەگە دەيىن وزگەرەدى. بالكىم مەديتسينالىق قوندىرعىلاردى ساتىپ الۋ ءدارى- دارمەكتەردى «س ق فارماتسيا» ارقىلى ساتىپ الۋدىڭ ۇلگىسىمەن ورتالىقتاندىرۋ كەرەك شىعار. ايتپاقشى، بۇل كومپانيانىڭ جۇمىسىندا بەلگىلى ءبىر ىلگەرىلەۋ بار»، - دەدى پرەزيدەنت.

اۆتور: ەسىمجان ناقتىباي